الرئيسية / صفحات المستقبل / الرأي و الحذاء الاخر

الرأي و الحذاء الاخر

 


عنا مشكلة كتير متأصلة فينا كلنا…انو كلنا هون ما بقصد جماعة معينة منشان ما يروح مخكون لبعيد…اي نعم انا اعتبر مندس و من الطبيعي احكي على خواريف المحبكجية لانهون حالة مثيرة للجدل و الشفقة…بس هون لما بقول الكل…بقصد الكل..نقطة.

منشوف العالم بعيوننا….و منحكم عالعالم بعيونا…منشوف كلشي من خلال فلاتر مخنا يلي اكتسبناها خلال حياتنا و محيطنا…من لما منولد على دين معين..منكبر و نحنا واثقين مليون بالمية انو الشي يلي نحنا منأمن فيه هو الصح..و الباقي كخ…اي نعم منتعايش و منتقبل…بس جواتنا….ديب انسايد…منقول..الله يهديهون..مساكين..مسلمين مسيحية يهود حمير..كلو نفس الشي…انا صح…و غيري لاء…حتى يلي بيقررو انو يتحررو من قيود الدين…بيخلقو فلتر لجماعة الدين و منصير منشوفهون اقل ذكاءا انو مساكين مو عرفانين وين الله  حاططهون….او بهل الحالة مو عرفانين وين اي شي صنعهون حاططهون ..منظهر تفهم…و منحاول نكون متفهمين…بس جواتنا…ديب انسايد…انو يفدح عينو شو حمار في حال كان ما منعرفو منيح للشخص..و منحاول نهديه او ندعيلو او نفهمو انو انت غلط بس بشكل غير مباشر اذا هالشخص قريب مننا…فكرو بهل النقطة….انت شو ما كان دينك او لادينك…شلون بتشوف او بتنظر لغيرك يلي مختلف عنك….هيك طبيعتنا…منشوف الدنية بشكل ثنائي الابعاد..

خلصنا من الدين..منكبر ببيت اهلنا…بسن المراهقة مننبعص من كتير شغلات اهلنا بيفرضوها عليها…منحاول نتمرد..و منمتعض..و منثور بطريقتنا….و بعدين..فجأة..لما منصير اهل..منعمل مع ولادنا متل ما اهلنا عملو معنا…ما منوقف لنفكر بالقصة انو انا كنت بتمنى لو اهلي فهموني و عاملوني بطريقة مختلفة…يلعن حياتي شو مظلوم…و بقدرة قادر…منساوي نفس الشي مع ولادنا..و لا منتذكر شلون كنا….الشب مننا بيهيص و بيتسلى مع بنات الناس…ووقت الموضوع بيجي لمرتو..اختو او بنتو…بصير تيس اكتر من التيس نفسو…منبيح و منبرر لحالنا انو الشي يلي عم نعملو اوكيه..بس الشي يلي غيرنا بيعملو…منصير مننظرلو من خلال فلاترنا الاجتماعية و الدينية..هالشب مننا ما بيوفر دبانة اذا صحلو…انو شب..يعني ذكر و عندو حاجات..بس وقت بدو يتجوز…بدور على وحدة ما باس تمها غير امها..و بأحسن الاحوال…ما باس تمها غير امها و كم واحد اذا كان منفتح و ليبرالي و يساري و كوول…..بس انو اكتر من هيك منكنتك و بتتضرب الفيوزات و بصير عنا حمية اضرب من تبع قريش….و مو بس هيك..منخلق مبررات لافعالنا ..ايه البنت شرموطة و انا عم اتعامل معها بالاساس…بس انو البنت ما بتكون شرموطة…بيكون الشب مغرقها حب و غرام و عيناكي بحر يدوب مدري شو بأعماقه و من هالعلاك….ببرر انها شرموطة لحتى ضميرو ما يجعو..بس وقت الجد…ايه يلي عملتو معي بتعملو مع غيري…شرموطة شو بدك تحكي..وينك يا امي خطبيلي وحدة جديدة مختومة…

الام…بتكون عاشت وقت كانت بنت ببيت اهلها متل الممسحة…حتى الممسحة ما عليها القيود يلي عليها…بتكون قرفانة عيشتها و انو ليش اهلي ما بيثقو فيني…ليش هيك بيعاملوني…و بعدين بتتجوز و بصير عندها ولاد…و فجأة بتتحول لامها و ابوها….الام يلي عانت بمجتمعنا من كبت من قيود و عقد و زبالة و حيونة و فوقية ذكرية…بتربي ابنها انو هو شب و الشب ما بيعيبو غير جيبو..و انو معليش يعني رجال و بدو يعيش يقبر قلب امو..خليه يعيش ايامو قبل ما يتجوز…ووقت بدها تجوز ابنها…بتنسى هي شو كأمراة و بتصير بتنظر للبنت من خلال فلاتر اجتماعية هي بذاتها عانت منها وقت كانت بعمر هالصبية…بيجوز الواحد يقول ايه الاهل بدهون مصلحة ابنهون…او ولادهون بشكل عام…بس انو بتتذكرو وقت كنتو بعمرنا شلون كنتو؟ و شو صار عليكون هلأ؟ عين الله عليكون و طلعتو من هالدنية بهل الخلفة التحفة يلي بدكون تربوها متل ما اتربيتو…و بتنسو اديش كنتو تنبعصو و تنقهرو من هالقيود و الظلم..

منشوف نتنياهو عم يخطب و يقول نحنا و اسرائيل و اليهود و حقنا و الفلسطينيين ارهابين و حيوانات..منقول الله يلعن ابوهون شو انهون مجرمين و كلاب..لك وين الانسانية…وين العدالة..شو هالظلم والاجرام……بعدين منشوف شخص مننا..عم يقتل و يشنع و يأجرم بولاد بلدنا..عم يرتكب مجازر ادام عيوننا..منشوفها…و كتير احيان منحاول ما نشوفها…منغمض عيوننا..منتطلع للجهة التانية..و طول ما انو البل ما وصل لدقنا..منبررلو..ايه هدول عصابات..ايه هدول حيوانات…اي هدول بدهون يخربو البلد..ايه هدول بدهون يرجعونا عشرين سنة لورا….ع اساس نحنا بعمرنا كنا قدام خطوة…..و اذا مات الفين واحد من طرش حوران…لعمى بقلبهون شو انهون حيوانات..هلأ هنن بدهون يعلمونا الحرية…..ما منوقف ولا للحظة لنشوف القصة من خلال حذاء الاخر…بيكون حذائنا غاطس بالخرى…بس وقت بدنا نحكم على غيرنا..منقيمو من خلال معايير نحنا اساسا ما منلتزم فيها…منحكم عليهون من خلال فلتر الخوف..او الامان يلي متوهمين بوجودو….منبرر لحالنا و ما فينا و لا بأي شكل نبرر لغيرنا…..منحكم على جرايم غيرنا..و منكون قمة بالانسانية و النخوة…بس وقت بيجي دورنا…منرجع لاصلنا الحيواني…..منصير شركاء بالجريمة…منبرر و منفتي و كل يلي بدنا ياه انو ضميرنا يرتاح  و نقدر ننام على مخدتنا مرتاحين…

مشكلتنا مو بنظام مجرم بس..مشكلتنا بعقلنا..بطريقة تفكرينا…بأزدواجية معاييرنا…كلنا هيك..لا حدا يستثني حالو…كلياتنا  بمرحلة من مراحلنا مرينا بهل الشي…كنا ولاد..و اخوات و ازواج و ابهات و امهات…..مشكلتنا انو لما بيجي الوقت لنحكم على شخص..اي شخص..بأي مرحلة من مراحل حياتنا…ما منحاول ولا للحظة وحدة انو نلبس حذاء الشخص الاخر و ننظر للامور من منظورهون..مننسى شلون حسينا لما كنا بمطرح هالشخص…..منختار الطريق الاسهل…اسهل لتفكيرنا..اسهل لضميرنا…اسهل لطبيعتنا الحيوانية..يلي مهما قلنا اننا بشر…الايام مرت علينا كسوريين و عم نثبت انو كلمة بشر كتيرة علينا…و بدنا دهر لنحقق انسانيتنا…اذا بعمرنا رح نحققها…

و الله يرحم شهادئنا..و يلي بأمن بالله و ساكت…يروح يكفر اشرفلو…و يلي ما بيأمن بالله و لسا ساكت…يروح على اقرب حديقة حيوان و يلاقي قفص و يعيش فيه…

 

http://hashashji.wordpress.com/

 

اضف رد

لن يتم نشر البريد الإلكتروني . الحقول المطلوبة مشار لها بـ *

*

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

x

‎قد يُعجبك أيضاً

فيينا تحذف سوتشي/ إياد الجعفري

    فشلت المقايضة بين فيينا وسوتشي، التي جرت بين الغرب وروسيا، في تحقيق تفاهم ...