الرئيسية / صفحات المستقبل / الرد على غدي فرنسيس , و الساطور الحموي

الرد على غدي فرنسيس , و الساطور الحموي


رد بسيط ,, تفصيلي , على مقال , نشرته صحيفة السفير اللبنانية , يقبح الثورة الحموية ,  لصحفية تدعي زيارتها لحماه

غدي فرنسيس ,, رح احكي معِك باللهجة العامية , كونك حبيتها وانت بالسيارة مع الحجة الحموية

و ما رح ادخل , على تاريخ عيلتك السياسي المشبوه , ويللي طعن اللبنانية كلهن , لأجل الاسدية

بديتي مقالتك عن حماه , وانتي شديدة الحزن عليها , وهالاسلوب , ممل وغبي , و هو دس السم بالعسل , انو بكتبلك مطلع بحسسك انو انا قلبي عليك , عشان تصدقني وتكفي قراءة

طبعا مو غريب لجوء , نظام فاقد الاهلية , لصحافة خارجية , لانو صحافة الداخل المؤيدة , وضحت معالم البلاهة على وجهها , فلجأ لبلاهة من نوع تاني , ممكن منغولية , ليكون صوتها جديد و مسموع , وبعتك لتكتبي  تقرير واقعي جداً عن حماه , يللي هلق فعلاً اتأكدنا , انها ورقة سقوط النظام , لانو حجم التجييش عليها , بوضح حجم الرعب منها

وصفتي الحموية بأوصاف من الخيال , وكأنك عم تكتبي المقال من بيروت , ولا مريتي فيها , او كأنو اتصل فيكي شي شبيح , وقلك على الرواية بعد ما قلك على رقم الشيك او الايداع بحسابك

بديتي مقالك برجعة لتلاتين سنة لورى , بس مشان تبني كلامك  , على انو ثورة حماة , ثأرية , وانو في تار مع  بيت الاسد عم يتاخد هلق , و الموضوع ابعد ما يمكن عن شي اسمو ثورة !!

حماه بنظرك صارت قندهار ,, وبيوت حي الشريعة و غرب المشتل , تقفلت شبابيكها بالحديد , من خوف اهلها من الثوار !!

و ممكن اسأل ليش الشريعة وغرب المشتل بس ,, يعني حي البرناوي الفاخر , شو وضعو مثلاً ؟؟ ليش الشريعة يعني ؟

وصفتي الشباب عالحواجز , بانهن  شبيحة ضد النظام !!  لما بدك توصفيهن هيك , بدك تفندي جرايمهن , متل ما نحنا فندنا جرايم شبيحة النظام , ولا شو رأيك ؟

وانو عم يتمتعو بالسلطة الجديدة ,, وين الغريب ؟؟  مدينتهن تحررت , وبدو يحافظو عليها , ولا كمان يروحو ينامو والضبع عالباب !!

منجي بقا عالزبدة ,, ( شباب بلحية سوداء , دون شارب , و تحت ابطه ساطور ) !!

ممكن تقلوليلي :  لما طلع 400 الف وتظاهرو , والهن 400 فيديو , وين كانت اللحية السوداء بدون شارب , و وين السواطير ؟

ممكن انو كميرة الجوال , مابتقدر تجيب ما تحت الابط ؟؟ , طيب هالسلفيين , كيف تركوكي تحوصي و تلوصي بيناتن ؟

و يجسدون دور الامن البشع ,, يعني كيف امن و بشع !! هالتعبير الخاطىء ,,  هو بقايا لذكرى الامن السوري بلبنان

وصلتي للمحل يللي انت بديتي كرمال توصليلو ,, و وصلنا الى حي الجراجمة , حي العراعرة ,, ع حد قولك

رح قلك : انو الدنيا والنظام , وكل مين شد ع ايدو فشلو , بكف تحفيز العرعور  للثوار , والنظام على يقين انو العرعور , رح يجيب اخرتو ,, وانت لعيتي قلبي من فوق لتحت , لتوصلي للعرعور , هدف النظام من مقالتك

عم تذكري انو في حراسة على شيخ الفتنة / العرعور / المنفي الى السعودية , مشان الله  , ما اغباكي ,, يعني شخص منفي من تلاتين سنة , لشو الحراسة على بيتو ,, عن جد وانا عم اكتب ضحكت عليكي ,, وبعدين كفيتي صعود في الجراجمة البائسة !! يعني كأنك عم تصوري  مشهد للصومال بعد الحرب الاهلية ,, والله يعني كل اهالينا بحماه , وعم ياكلو و يشربو , ويغنو بالمظاهرات , والكل مظبط دقنو وشعراتو ,, و الجماعة فرحانين بريح الجنة من كترة الشهداء وفرحانين بانو الحرية , صارت على عتبة الباب , وين البؤس يللي شفتيه ؟؟

و انو زعجوكي لانو طلبو هويتك , وبرأيك انو لو كان معك السفير الامريكي ,, ما وقفوكي ,, كتير كلامك وارد ,, يعني سفير لدولة عظمى , / عاطلة و بنت كلب / بس كلب يعوي الك , ولا كلب يعوي عليك

و بترجعي  بكل غباء , بتوصفي الحواجز و الامور الامنية للثوار , بحي الشريعة حي الاغنياء على قولك , بتوصفيها بانو تليق بالحي , طيب ما انت بديتي مقالتك انو شبابيك بيوت حي الشريعة مغلقة بالحديد !!

بعدين منجي ,, لأستهزائك ,,  بلقاءك لثلاثي قيادة الثورة بحماه ,, وكمان غباء جديد !!

معقول قيادات الثورة , الثلاثة حسب وصفك , يكونو سوى و مع بعض دائماً , ويجو يقابلوكي ويعرفوكي بحالهن !!!

ليش يعني شو المكسب منك ,, منو انتي ؟

بعدين عم تستهزئي ,  بانهن ثوار الفيس بوك , وما بيفهمو  بالسياسة شي ؟؟

اذا ثلاث ثوار فيسبوكيين ع قولتك , هزو عرش النظام , وكم يوم وبيسقط , معناها مين مكان السخرية الفيسبوكية ,, هنن و لا عائلة الاسد ؟؟

بعيدن بتشغلي قريحتك التحليلية انو الاخطار الاجتماعية يللي تقرع حماه على حسب ما قالولك ثلاثي قيادة الثورة : هي العرعور والسلفين , والاتراك , والطوائف و امركيا !! ,, انت عقلك براسك شي ,, كيف طلع معك انو الثوار والنظام بيتشاركو بنفس العدو ؟؟

يللي ذكرتيهن اعداء النظام حسب قناة الدنيا وابواقو ,, ليش شو صار  بين الثوار والعرعور ؟ او اردوغان ؟

و كيف ظبطت معك , خوفهن من الطائفية !! وهن ناس على وصفك اخونجية ؟ وكيف متخوفين من السلفية , وانت عم توصفيهن قبل شوي بالسلفيين وبلا شارب ؟ صف حكي ,, يعاب على جريدة متل السفير تشيلو من ارضو !!

منوصل لطريق رجعتك عالشام ,, و انطباعك  عالست الختيارة يللي كانت معك  بنفس السيارة , و عم تحاسبيها عن كل حرف عم تحكيه ؟؟

ذكرتي انها , قالت ما بدنا العرعور , وقبل بسطرين ذكرتي جنابك  , كلامها انها متابعة يومية لقناة الوصال , من وين متخرجة  انتي ,, وليد المعلم و لا بثينة ؟؟

طبعاً لجوئك لكلام ست كبيرة , هو كرت اخضر الك , لتبثي كل سموم النظام , او طلباتو منك , لما ملى عليكي المقال , من عن طريق تحليل كلامها و كأنك عم تحللي كلام وزيرة ثقافة او اعلام , فصورتيها , وكأنها بتمثل الحموية كلهن بكلامها , ليسهل عليكي التعميم  , و انو الحموية كرهانين حلب والشام , و انو كل شي الا العرعور , و انو شوي بتلاقيها اسلامية ملتزمة , وشوي صارت تغني لأليسا , و طبعاً , رجعتي تحكي بالساطور , واستمريتي  بمقال مافيو كلمة موثقة , وبتقولي بالبداية حماة تتنفس حرية , وبتنتهي : حماه كلها بؤس !!

بعدين شو هي ابادة جماعية , ليش عم تذكري  كلمات منسية , واملك وامل النظام انو ترجع حماه تتبنى الثأر منو , ليلاقي حجة للهجوم

البوصلة يللي عم تذكريها مع بعض العبارات , لتدل انك صحفية مرة , واضحة و مؤشرها ما تزحزح من 15 /3

وعم تقولي الحموي لم يربح يوماً , في تاريخ السياسة , لهالدرجة انت غبية سياسياً , و مفكرة انو السياسة محصورة , بحافظ الاسد و ولادو , و جعجع , و الحريري , و سيد المقاومة ؟؟

 يا صحفية النص كم , هدول اطفال السياسة , الك تشوفي اعمارهن او تبعياتهن , لتعرفي انهن كركوزات , شلون طلعت معك حماه لاعب سياسي ماهر , ولكن خاسر !!

 شو مشان اديب الشيشكلي مثلاً و لا اكرم حوراني , على سبيل الذكر لا الحصر , ولا قصدك تاريخ سوريا السياسي , هو تبع بيت الاسد بس ؟؟

 طب سؤال ,, مازالك من دين اخواتنا المسيحيين , ليش ما رحتي على شارع المدينة , وشفتي الكنسية و الرصاص يللي عليها , وان حبيتي ما تذكري :  بانو جيش الاسد هو صاحب الجرم , كان فيكي تقولي : انو قعدتي مع حدا مسيحي , و قللك انو الحمويين الارهابيين , هنن يللي عملو هيك بالكنيسة , يعني كانت فتنة داخلية , بتطلع ظريفة , والحكي بلا جمرك

يعني ذكرتيني بتقرير قناة الجديد , عن عصابات جسر الشغور , وقنابل البوليينغ اليدوية !!

يا طفلة الصحافة الاسدية : سقوط الاسد قريب , ورح تسكر قناة الدنيا او تتحرر , وقناة المنار رح ترجع عالاناشيد والادعية , وقناة الجديد رح ترجع للكليبات , وانتي و امثالك , و وهاب وقنديل و رفيق يا رفيق نصرالله , تبع جمعة خلصت وخلصت ونص , كلكن رح تكونو بلا مردود  , لانو بزوال  الاسد , رح تنظف لبنان كمان , و ما ح يبقى مجال  لبث سمومكن الداخلية حتى

بصراحة مقالتك كانت وازنة معك ,, يعني عملتي عدد قراءات منيح , و نشرتي اسمك , بلكي احتاجك رئيس عربي في مرحلة سقوطه , غير الاسد طبعا , و عبيتي الجيبة

و رح اختم بتلميحك يللي وصفتي حالك فيه من دون قصد ,, انو الحموية حطو عقود الورد على عنق السفير الامريكي ,,

طيب يا صحفيتنا المغوارة ,, ما سألتي حالك ,,  ليش الك احتقروكي ؟؟

بصراحة في كتير فراغات , بتدل انها ما زارت حماه بنوب , بس عن جد صعب النقد لكل الكلام , لانك عم تنقد شي مو موجود , فشو نفع النقد اصلاً ,,

سفير امريكي , و سفير فرنسي , والسفير البنانية , وآصف شوكت , و محافظ جديد

لله درك يا حماة

الثورة مستمرة ,,

اضف رد

لن يتم نشر البريد الإلكتروني . الحقول المطلوبة مشار لها بـ *

*

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

x

‎قد يُعجبك أيضاً

فيينا تحذف سوتشي/ إياد الجعفري

    فشلت المقايضة بين فيينا وسوتشي، التي جرت بين الغرب وروسيا، في تحقيق تفاهم ...