الرئيسية / صفحات المستقبل / تضرب منّك لألو…….مهداة الى جميع المتطرفين من كل الأطراف السياسية

تضرب منّك لألو…….مهداة الى جميع المتطرفين من كل الأطراف السياسية

 


 

النّاس انزعجو من كلمة تضرب منك لألو لما قلتا للمعارضين والمؤيدين على حد سواء ما هيك؟؟؟؟

اي منيح يلي انزعجو  هاد المطلوب

مشان يحسو كيف كل واحد فيون عم يستفز التاني لما عم يسبو بعض ويخوّنو بعض

وحاليّاً كلو كذب بكذب والطرفين عم يعلبو فيكون متل يلي عم يلعب بمجموعة أطفال بلا شخصية بيعلمون شوية حكي وهنن بيضلو بيعيدوه وما في ولا واحد عالأقل فكّر ليش

ونازلين خبط حكي ببعض وعم تلعنو دين البلد وما رايحة الّا علينا نحنا يلي محترمينكون وساكتيلكون

بس بلا مؤاخذة عطيناكون وش مو تزودوها وتخربو البلد وكل واحد مفكر حالو وطني وبطل الموسم

هي جوز كلام للطرفين كل واحد بدورو اسمعوه وفكرو فيه نصيحة

انو تعا لشوف يا متظاهر (الحكي موجه لفئة متطرفة معينة بتعرف حالا)…….. من ايمت كنا نحكي انو بدنا تدخلات خارجية؟؟؟

من ايمت كنّا نثق بناس من برّا البلد يجو يعلمونا كيف نعيش؟؟؟

من ايمت كنا نسمع انو في معارضة خارجية نوثق فيهون؟؟؟

ومين هنن وشو أسمائون وشو موقفن من البلد والسياسة الخارجية تبعها؟؟؟

ما منعرف ولا منوثق غير بالمعارضة الداخلية المثقفة يلي هنن عم يفضلو الهدوء حاليّاً رغم انو ما حدا عانى من الحكومة قدون على قد ما خلوهن يتعذبو وينحبسو ويتعذبو بتهم غبية لقمع الرأي وهلق لحتى فاقت الحكومة تفتح حوار معهون بعد ما اكتشفو انون مثقفين احسن من غيرون

طيب اذا هدول المعارضين الفهمانين ساكتين وهاديين انت ليش ضايج؟؟

اخي قعود ببيتك يومين مشان الله واذا خايف بعد ما تهدا الامور يجو يعتقلوك انت وغيرك لمجرد انكون معارضين ولفقولكن شي تهمة وحبسوكن…..اي وقتا انا وكل الناس يلي ساكتة بدنا ننزل ونطالعك انت وكل معتقلي الرأي  الجداد والقدامى يلي ما شملون العفو فلا تخاف ما حدا رح يسترجي يقرب عليك

بس اذا لسا بدك تحكي بالمساعدات الخارجية بدي قلك تضرب منك لالون

وحاج تعملّي انو عأساس ما بدك تحطّا واطية…..اعتبرها تجربة لحتى تثبت عدم نيّة السلطة بالاصلاح واذا فعلا طلع كلامك صحيح وقتا نزيل ما حدا بيحاكيك شي ومننزل معك كمان

بعدين من وين كل ما سمعت خبر دراماتيكي من جماعة صفحات المعارضة بتصدقو وبتبلش تنشرو على بلا طعمة؟؟؟

انو شو ما بيقولو بتصدق؟؟

يعني اذا قالولك حزب الله اجا على سوريا يقمع متظاهرين بتصدق؟؟

أنو مفكّر انو اذا حرقت علم روسيا والصين رح يردو عليك ويسمحو لمجلس الأمن يتدخل؟؟

انو مفكر القصة شغلة بوسة شوارب وبتنحلّ؟؟

مفكّر القوى الخارجية جايين يحررولك أرضك و يطعموك بسكوت وحلويات؟؟

والله ليطعموك ويطعمونا شي من يلي بالي بالك (ايواااه هاد هو) عرفت كيف؟؟

هدول ما بيجو ببلاش يا عيوني…..هدول لا سائلين لا عنك ولا عني وحياتك

وصدقني هدول ما بدون شي غير مصلحتون وهلق بيعطوك وش وبيقولولك بدنا نساعدك

وبكرا وقت الجدّ بيصير بدنا مين يساعدنا

واذا ما عجبك الحكي

تضرب منك لألون

 

وانت يا مؤيد (المتطرفين وبيعرفو حالون كمان)…… انو انت ايمت بدك تشغل عقلك؟؟؟

بتحب جبلك كتاب المنطق واقرالك ياه كل يوم لتصير تفهم تسمع أخبار؟؟

انو لسا حاملّي كلمة مخربين ومندسين وهي هي السلمية تبعون وهي هي الحريّة تبعون؟؟؟

انو بالله سمعت بحياتك شي مرة بمتظاهرين معارضين قالت عنون اي حكومة انون شرفاء وسلميين؟؟

يعني متوقع يجي وزير الداخلية ويقول في عنا متظاهرين معارضين سلميين معون حق بالطلبات وعم نقمعون ونحبسون ونقوص عليهون؟؟؟

انو من ايمت كنا نصدق ونعيد كل شي منسمعو على أخبارنا الرسمية الحجرية يلي كلنا منعرفون؟؟؟

انو ما سألت حالك هالمندسين ليش ما منشوفن غير وقت التظاهرات متل الاشباح؟؟

ما فكّرت هالمندسين المخربين المهلوسين ليش ما نزلو على الشام مثلاً أوحلب أو المدن يلي ما فيها تظاهرات يقوصو ويروعو السكان ويخوفوهن (علما انو هالتخريب والترويع أبداً مو لمصلحة الثوّار) أو ليش مثلاً ما نزلو عالمظاهرات تبع القامشلي يخربو ويقتلو(طبعاً العشائر والأكراد يعني مو مزحة معون)؟؟؟

ولا شكلون المندسين بس بيطلعو بمناطق التظاهر متل ساحات حمص الكبرى قدام عيون الأمن وبدرعا ودوما واللاذقية أو متل حماه يلي التلفزيون السوري قال انو المندسين اندسو بين المتظاهرين الجمعة الماضية وقوصوهن وقتلو شي 50 واحد!!!!!!!؟

اي ريتون يندسّو بأجري على هالأخبار المحششة

انو بس شاطر لما تشوف فيديو لرجل أمن أو من الجيش مقتول تقعد تعرضها مع كل نفس بتتنفسو بس فيديوهات عن 1200 شهيد مدني هدول مو بني آدمين تسئل عنون؟؟

أنو شو هاللجان يلي كل يوم بينزلوها كل يوم شي 20 لجنة لتقصي الحقائق وتحقيق واصدار قوانين وهالحكي كلو ولهلق ما شفنا شي

ولا قانون من الطلبات الرئيسية شفنا (لا احزاب ولا إعلام ولا تطبيق لرفع الطوارئ الاعتقالات بالمئات بلا تهم ولا شفنا نتيجة تحقيق ولا شفنا محاسبة حدا من المعروفة أسمائهون يلي قتلو الناس ويفترض انو اعتقلوهن) انو بناء على شو عم تسب المتظاهرين اذا لهلق ما عطوهن شي غير الشغلات يلي ما طلبوها (مازوت ومعاشات وهالقصص)؟؟؟

لسا عم تدافع عن المماطلة وتتحجج بالمسلحين يلي عم يقتلو عالهوية (الهوية السورية ما عليها الدّين والمفهوم كلو مستورد)؟؟

اي شو الوزراء هنن يلي عم يقاتلو المسلحين لحتى مشغولين وما فاضيين يحلو طلبات المتظاهرين الواضحة من الأول؟؟؟

ولا رئيس الوزراء بحكم انو كان وزير زراعة معناها مفكر القرارات بتنزرع زرع وفكرو يتركون لأول الموسم؟؟

من ايمت كنّا نسمع انو بسوريا في مجموعات مسلحة تقطع الطريق الدولي بين دمشق وحلب ليوم كامل والجيش ما اتدخل؟؟؟

انو بدك تقنعني انو هاد صار صدفة مو جماعات لتخويف الناس يلي عالطرقات مشان يشوفو مسلحين ويرجعو على بيوتن يسبو الثورة وساعتها ويقولو الثورة كلها مخربين!!!؟؟؟

انت بناء على شو عم تقول عن كل مين عم يحكي متل هالحكي خاين؟؟

وانو كل مين بيتظاهر حريري وخدام وعرعور وأنه هنن من أتباع الجزيرة والعربية؟؟

شفت شي بعينك؟؟

كتير غريبة يكونو جماعتنا كمان عم يفبركو فيديوهات ضد الثورة لحتى يصير تدخل الجيش مشروع ويفوتو يحرقو دين المعارضين؟؟

انو غريبة يعني جماعتنا قمة الشفافية واحترام العقل لحتى ما يطلع معون هيك شي؟؟

أنو فهمنا بدنا المتظاهرين يهدو بس اذا حضرتك بدك تضل نازل فيهون مسبّات وبهدلة وتخوين ما رح يهدو أبداّ

يعني اذا مفكر انو بدك يقعدو ببيتون بالصرماية فانت كتير غلطان لانو انت كل ما تقول هيك هنن عم يعصبو وينزلو أكتر ولا انت ولا غيرك بيقدر يهديهون بالعنف والقمع

يعني أيها المؤيد المتطرف أحسن شي بتعملو أنك تسكت عالخالص وتدعم الهدوء وعدم الاهانات وشوف كيف هنن رح يهدو لانو بس تصير مجرد مكرر لهاد الحكي المنسوخ من التلفزيون بصير بحسّك رجل آلي لا بل التلفزيون بيكون أبفهم منك (التلفزيون الجهاز مو المحطة) لانو متلك متلو وشغلتكون بس الاستفزاز

ما بدي ياك تناقش التفاصيل يلي حكيناها اذا برأيك انا كذاب يا اخي على عيني انا كذاب وشو ما بدك بس بدي منك تسكوت مشان غيرك يسكوت وحاج تستفز البشر وتتحجج بالشهداء لانو متل ما انت عندك هنن عندون متلون ويمكن أكتر

يا حكي بشي يفيد ويهدي البلد يا أما ريحنا من صوتك وكتاباتك

 

صايرين كلكون متل الشعوب الطائفيّة تبع بيجي رجل دين بيقول كلمة والكل بيصيرو بيعيدوها وراه كأنو الحكي تبعو منزل

كل يوم نازلين ببعض على حكي طالع نازل وسبسبة وبدكون يانا يا نكون أشبال سوريا الأسد حصراً أو أبناء سوريا ضد الأسد حصراً

اي أنا لأني بحب سوريا شايف أنو بدي كون سوري وبس سوري وحصراً

 

أخي نحنا الشعب مو مصلحتنا لا نخدم الخارج ولا نخدم الداخل

الخارج بدو مننا نساعدو ليتدخل ويستفاد من الوضع ويعمل مصالحو

والداخل بدو مننا نساعدو لحتى يقمع وما يساوي لا إصلاحات ولا شي

ونحنا عم نقول للخارج تعا اتفضل احتلنا وعميل شو ما بدك أو عم نقول للداخل تعا اتفضل دعاس على راسنا وخليك عم تقمعنا وتخرسنا

الشعب اذا بيفهم بيلحق مصلحتو ومصلحة البلد بالهدوء وعدم الاستفزاز والانجرار ولا أي طرف ونقعد ببيوتنا لحتى الطرفين يصيرو بخدمتنا شعباّ وبلداً متل ما اي دولة بالعالم لازم تكون

الداخل مجبر يعطينا حقوقنا وكرامتنا والخارج منتعامل معو بسياسة متل العادة مو بأخوية ساذجة ومنتعامل معو بمصلحة

أما اذا كل ما حدا من الطرفين حكا كلمة بدنا نجدبا ونعصب ونتهجم عالطرف التاني فرح يردّ علينا بالمثل وبكرا اتفرجو وشوفو كيف الخبط لما يقررو انو بدون يانا ندافع عنون و يشتغل القتال بين الناس متل الشعوب يلي ما بتقرا ولا بتكتب ولا بتحلّل شي مشان نصير نقول بس رجعونا متل ما كنا وما بدنا لا اصلاح ولا ثورة

نحنا منتقاتل وهنن بيلعبو فينا كل واحد حسب مصلحتو

خلصونا ولدنة بقا…….بدنا نعيش….بدون عنف….بس بكرامة كمان

وانت وياه عم تخربو البلد بداعي الوطنية

عرفت ليش تضرب منّك لألو؟؟

اي تضرب منك الو

 

( مو الكلّ بس يلي يفترض صارو بيعرفو حالن بعد هالمقال)

 

اضف رد

لن يتم نشر البريد الإلكتروني . الحقول المطلوبة مشار لها بـ *

*

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

x

‎قد يُعجبك أيضاً

فيينا تحذف سوتشي/ إياد الجعفري

    فشلت المقايضة بين فيينا وسوتشي، التي جرت بين الغرب وروسيا، في تحقيق تفاهم ...