تعريص سياسي

نعتذر مسبقا ً من كل مرهفي الشعور اللذي قد يزعجهم العنوان السوقي للتدوينة التالية ! لكنه الأكثر عفوية وصدقا ً بنظري  لوصف بعض السلوكيات التي تتعرض لها الناشطات في عالمنا

حادثة كشف العذرية :

بوحدة من الليالي الملاح في ميدان التحرير ، كان في شباب وصبايا معتصمين “ ووطن وحرية وما إلى هنالك من أمور “ وإذ تبدأ الاشاعة بالترويج أن هناك دعارة تحصل في الميدان

وترويج الاشاعة برعاية الجيش وشبكة رصد مشان يتم تبرير اقتحام الميدان بالقوة !

وبالفعل بيحصل اعتقال مجموعة من الشباب والشابات اللي بيتعرضو للتعذيب المعتاد كضريبة كونك ناشط بمناطقنا يعني ، ما في شي غريب

أما الفتيات فخلعوهن ملابسن !!! لاجل الكشف عن العذرية وتصوير “ أمام ضباط الجيش “ بعدها تم التهديد بأنو اللي بيرفع دعوة ضد الجيش بيروح فيها قضية دعارة

الحادثة المقرفة هي بترجع بتصفعنا بشغلتين ، اول شي أن الشرف بالمفهوم العام لازال يقمع بين رجلي البنات ، فانتهاك الخصوصيات والتشهير والتحرش والسرقة كلها ما متل كفرية أنت عذراء أو لأ

ان الجنس هو المحور اللي بندحشو بالسياسة عندما يتعلق الموضوع بالناشطات السياسيات

رح تحسب انو هاد تعميم خاطئ ورح تقدر تشتم هالحالة بما انها ما حصلت عنا .. طيب خلينا ننتقل لحادثة تانية

اعتقال طل الملوحي :

طل الملوحي مدونة سورية تم اعتقالها من فترة ، قصة اعتقال اعتيادية عنا ! الغير اعتيادي التشهير اللي طال البنت اللي عندما لم يكفي اتهامها بأنها اخونجية بتخفيف التعاطف معا

صار يتم الحديث عن حياتها الجنسية الغنية (شي اعقد من اي فيلم بورنو حضرانتو ) ، وعشاق من كل الجنسيات وحتى وصولا لعلاقات اهلها الجنسية

هالحادثة كمان ما عجبتك ؟

ببلد تاني منعرفو منيح ! وقت بيستدعى بنت عالتحقيق بيتم تهديدها بالاغتصاب والفضيحة

لهيك كلمتين من الأخير

وقت بتاخدلي فحص عذرية قبل ما تطلع النتايج فيني اعرف انك أنت اللي بلا شرف

وقت بتشهر فيي وانا معتقلة لازم انت يتم اعتقالك تشهير وقدح وزم

وقت بتهددني بالاغتصاب والفضيحة هي فضيحة ألك مو ألي

وخلاف ذلك .. إذا صار وعم يصير فهو تعريص سياسي