الرئيسية / صفحات المستقبل / رأي مستعمل ليوم واحد وللبيع

رأي مستعمل ليوم واحد وللبيع

 


Tammam Simoaa‏ ‏‏

من كثر ما سمعت أخبار  قررت ما عاد اعتمد على رأي المحللين ولازم يكون عندي رأي خاص , فتحت المطّمورة وأخذت كل شي معي مصاري ونزلت على السوق,محلات الماركة عاملة تنزيلات على الأراء لأنو بهي الظروف عليهم طلب زايد بس  أنا للأسف ما كان معي مصاري يكفي,

أول بسطة شفتها اشتريت من عندها رأي ,حاول البياع يحط رأي الجديد بكيس أسود بس أنا ما رضيت. وانا بطريقي على البيت شفت جدي ولما شافني  صاح بنص الطريق:شو ياولد جايب رأي ؟؟ وكالعادة تأفف ورجعني لأيام زمان وقال:هي أراء هي؟؟   أنا بس كنت شب كان عندي رأي بكل البلد ما في متلو  ..مو متل رأيك هاد!!!                           أنا مارديت مفكر مشي الحال .بس المصيبة لما وصلت على البيت وشافتني أمي تغيّر لونها

وقالت : الله يصلحك على هالعملة . حدا بجيب الرأي على بيتو بهالأيام .ليش ماعم تسمع شو عم يصير ,كل واحد عم يعرفو أنو عندو رأي عم ياخدووو!!!!

ورجعت سألت أمي : من وين جايب رأيك ؟؟؟؟

جاوبتها : من بسطة من الشارع .

زورتني و قالت :ليش ما عم تسمع أنو أراء الشارع مو نظيفة ,, وبلهجة أمرّ قالت : هات عطيني رأيك لحطّو بالغسالة  من شان يصير رأي نظيف . بس أنا كالعادة رفضت وقلتلها هاد رأيي وانا حرّ فيه انت شافتي وسخ أنا شايفو كتير نظيف  . كم دقيقة وفجأة سمعت صوت انفجار نزلت على الشارع سألت الجيران شو في ؟؟ رد الكل ما في شي بس واحد ما عرف يستخدم رأيو قام قتلو يعني صار من شهداء الرأي . صحيح أنو خفت بس قلت  ما رح أتراجع أنا واعي وبعرف كيف أستخدم رأيي .

وأنا بالطّريق شافني أبن عمي المكانيكي ودغري قال: شو هالرأي يلي معك كأنو مستورد يا أخي طبعا أنتو طلاب الجامعة كل شي أجنبي بتعملو موضة .

رديت : بس هاد الرأي مو  أجنبي…  … قاطعني : سكوت سكوت كل شي عم تتعلمو بالجامعة حكي فاضي هون بهي البلد ما في شي اسمو رأي . ودار ظهرو مشي .

وهون قلت أكيد ما حدا رح يفهمني متل البنت يلي بحبها رح شوفها وفرجيها على رأييّ.لكن للأسف بس عرفت رأيّي طعجت شفافها وقالت بلهجة كتير كتير سيّنيه : كووووول بس يعني  كأنو رأيك كتير كتير بلدي !!!!!وصراحة أنا هيك أراء ما بتناسبني  .

وأنا راجع عالبيت بيرن الموبايل وبيطلع صوت رفيقي من السماعة : كيفك يا زلمة مبروووك شو خبرونا أنو اشتريت رأي الله يصلحك يا زلمة كنت خبرتني قبل , كنّا رحنا على البالة كل شعبك عم يشتري أراء مستعملة شوضروري جديد ؟؟؟… وبعدين فصل الخط  لأنو الشبكة كتير منيحة وخاصة بهي الظروف …

ولمّا سكرت الدنيا بوجهي قلت ما إلي غير أختي .  وقلتلها: شو هالناس كل واحد ما عندو رأي وجاي بس يتفرج على رأيي ويجعلكو  من اليمين ومن اليسار ..

ضحكت أختي وقالت : ياغشيم كل واحد عندو رأي بس مخبيه  وبعد فترة لما كل شي يبين كل الناس بتطلع وتقول شوفو رأيي شو حلو …

بعدين أخذت قرار تاريخي ورفعت سماعة التليفون وحكيت مع أبو شادي صاحب المكتب العقاري وقلتلو : عندي رأي بدي بيعه وبالتقسيط المريح وبدون دفعة أولى .

جا وبني أبو شادي: والله الحالة واقفة  لأنو كل الناس هالأيام عم تبيع أراءها

 

اضف رد

لن يتم نشر البريد الإلكتروني . الحقول المطلوبة مشار لها بـ *

*

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

x

‎قد يُعجبك أيضاً

فيينا تحذف سوتشي/ إياد الجعفري

    فشلت المقايضة بين فيينا وسوتشي، التي جرت بين الغرب وروسيا، في تحقيق تفاهم ...