الرئيسية / صفحات المستقبل / ماذا تعرف عن الشعب السوري؟

ماذا تعرف عن الشعب السوري؟


نحن شعب وطني عالاخير..و شايفين بلدنا و مو مصدقين….احلى بلد بالعالم و نحنا الكريم دو لا كريم تبع العرب و الشرق ككل ما عدا اليابان..بس حتى اليابانيين..انو اذكياء و متطورين..بس نحنا احلى…. منشوف اللبنانية طائفين و تافهين..و الاردنيين بجم…و الخليجية بدو و حمير…و نحنا احسن الشي بالعالم….لاء حتى بأفريقيا و اجزاء كبيرة من اسيا…بس الله يلعنك يا اسرائيل…

نحنا  شعب واحد..بس  فوقي و طبقي على مستوى محلي….الشامي مفكر حالو بطل العالم و ابناء باقي المحافظات كخة….و حلب ع اضرب و متلها متل اي محافظة تانية…كل محافظة بسوريا سكانها احسن سكان سوريا… و حتى ضمن المدينة الوحدة… مسيحي الشام بفكر انو هو ارقى من مسلم الشام…و من المسلمين السوريين ككل…المسلم الشامي عند حالو هو  انو هو م رب الانسان المسلم السني الفهمان الراقي المتحضر يلي بيعرف بكلشي و من وين ما بتنقرو بيرن و نيال يلي بدها تاخدو و الله يهني جوزها عليها….

نحن شعب صرلنا مليون سنة منقول انو نحن السوريين غير و نحنا مالنا طائفيين و بعمرنا ما كنا طائفيين…بين يوم و ليلة قالولنا انو انتو طائفيين… قبلنا و سلمنا بالموضوع و صرنا منحبو….

نحن شعب الطموح مننا و يلي ماعندو معلقة دهب بتمو…لازم يسافر برا البلد…ارض الله واسعة……بس بعد ما يتخطى حاجز البسبور السوري الملعون..مطفش الفيزا و محبط الحلم السوري بالطفشان….

نحن شعب ما منعرف تاريخنا…و عم نتعلم عن حالنا من قناة الدنيا و السورية و البوطي و غوار الطوشة ….

نحن شعب متسامح ما منكفر حدا…الا اللهم  ليلي بيقول حرية او ما بحبو و ما بدي حبو المحبة من الله…لك حتى الله…نحن شعب ما عنا مشكلة انك ما تحب الله…بس بدك تحب القائد…يا اما انت  خائن و حيوان..

نحن شعب ما منحب التغيير بطبعنا..و يلي بيحكي بالتغيير…منخاف منو و منرفسو و منعتبرو مغرر به….

نحن شعب مسالم متل المي منختار المسار الاسهل و لو كان هبوطا… المهم يكون اسهل..بيموت كم الف مننا…منختار نصدق قصص منعرفها كذب…بس بدنا نصدقها لانو اسهل انو ما نصدقها من انو ما نصدقها و يصير علينا واجب انساني قبل وطني انو نقول حاجة…

نحن شعب يلي بياخد امنا…منقلو عمنا…و امنا درويشة  و هي و نحنا مالنا رأي بعمنا…..بس اخترنا  نسجدلو و منصفقلو و هو عم يستبيحها مع رفقاتو و اخواتو….

نحن شعب عنا مشكلة بالحرية…الغالبية مفكرين حالهون بيعرفو شو هي الحرية…و ساكتين و خايفين طول عمرهون… و عم يقولو للباقيين انتو شو فهمكون بالحرية…و الباقيين يلي عن جد بيعرفو معنى الحرية .. عم يتقوصو و ينشحطو مع عيلهون…..

نحن شعب ثوري و ممانع…و منرفض الاحتلال و منتمهزأ بكل العرب يلي مالهون متلنا…و بنفس الوقت اكتر شعب عندو اراضي محتلة بعد فلسطين..شمالا و جنوبا….و اخر رصاصة اطلقناها ضد المحتل كانت بالتلاتة و سبعين من القرن الماضي….

نحن اكتر شعب عربي صار فيه مجازر…من حماة..لصيدنايا…لدرعا و تدمر…قتلانا اكتر من قتلى فلسطين….اسرائيل يا دوب قتلت 8000 فلسطيني خلال اخر ايدعشر سنة…نحنا بأسبوع واحد بحماة قتلنا اكتر من ضعفين هالرقم….و انتظرو جديدنا للعام 2011….

نحن شعب ما عندو مشكلة يصير مجازر عندو….المهم تصير بعيدة عنو و ما كتير تأثر عليه و على رزقو….

نحن شعب صاحي منشوف ميتين فيديو فيهون ناس عم يقولو واحد واحد الشعب السوري واحد و فيديو فيه واحد عم يقول جهاد…منصدق الفيديو الوحيد و سحقا للسلفية….

نحن شعب عادل…من فترة صغيرة طلع فيديو للجيش الاسرائيلي عم يعتقل طفل فلسطيني…ما ضل حدا مننا الا نشر الفيديو عالفيسبوك و هون و هنيك…و تعالت اصواتنا يا حيف على العرب…وينكون يا عرب….و لما اطفال درعا تم اعتقالهون و تقلعت اضافيرهون..كمان نشرنا فيديو الطفل الفلسطيني و ضلينا عم نقول لك وينكون يا عرب….

نحن شعب قبضاي و زكرت و صاحب نخوة..ما منخون بعض و منوقف مع بعض ضد الظالم و لما واحدنا تحت الضرب مندافع عنو…هيك قالولنا بباب الحارة….

لذااااااااااااااااا….

و بناءا عليه…نحن الشعب السوري اعلاه… لدينا المطالب التالية.. يعني مو كلها…بعضها…انو واحد او تنين..او بلا…اذا ما بدكون تلبو شي و لا يهمكون..منعتذر سامحونا منشان الله….عادي..ما رح نعمل شي….مياوو..منعجبكون… تربايتكون ولو:

– تعديل الدستور و استبدال كلمة الشعب بكلمة قطيع او رعايا

– تعديل الدستور و استبدال كلمة الجمهورية بمملكة او بشركة مساهمة مغفلة

– تعديل القرأن و استبدال كلمة الله ببشار

– تعديل كتب علم النفس و استبدال كلمة ستوكهولم بسوريا او اختراع متلازمة جديدة بأسمنا

عن حشيش سوري

اضف رد

لن يتم نشر البريد الإلكتروني . الحقول المطلوبة مشار لها بـ *

*

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

x

‎قد يُعجبك أيضاً

فيينا تحذف سوتشي/ إياد الجعفري

    فشلت المقايضة بين فيينا وسوتشي، التي جرت بين الغرب وروسيا، في تحقيق تفاهم ...