مهر الغالية.. غالي
هاي، كيفك؟! ما باركلتيلي.
ما قلتلك…
قلت لحالي ما بدي البّكِكْ. حاكم عشت السبع دهور. وقطعت السبع بحور. وعبرت السبع حدود. لحتى وصلت لهون. يا حزرك أنا وين؟! ما رح اقلِّكْ. احزري لحالك.
يحرق حريشك. كيف عرفتِ أني صرت بألمانيا؟ عن جد مو متراجع ذكائك بنوب عن قبل. أنا قلت لحالي الحرب والتشبيح المتنوع حواليكِ رح يخليكِ بلا عقل. لا ما شاء الهي ويخزي العين لساتك بكامل قواكِ العقلية.
عن جد أنا بحسدك على هالقوة اللي جواتِكْ حبيبتي.. عفواً.. أحم أحم. مو قصدي شي. كلمة وبتنقال. بتعرفي لساتني سوري حتى لو صرت بألمانيا. لساتني بقول لأي وحدة حياتي وحبيبتي بشكل أوتوماتيكي. ما بعرف بس يمكن أنو لغتنا لغة محبة مو هيك؟!
المهم هلأ ما لِك بالطويلة. أنا هلأ صرت تقريباً ألماني. وحابب اكمِّل نص ديني مع أني علماني. وبيني وبينِكْ أنا معجب فيكِ كتير. وحابب أطلب إيدِك منِّكْ حياتي. آسف لأني قلت حياتي. بس أحياناً في كلمات بتطلع مني غصباً عني. وهاد سبب مغادرتي للبلد. لساني متبري مني يا قلبي. بقى شو رأيِكْ بمشاعري تجاهِكْ؟! انشاللا ما اكون فايت بطريق غلط وعم اسبِّب إزعاج؟
عن جد بتحبيني؟ وحياة اللي مَرَّقني من هنغاريا بدون بصمة فلجتيني. وحياة مين عطاني الجنسية.. عفواً الإقامة، فاجأتيني. كتير غمرني حبِّك. ما بعرف ليش ذكَّرني بالبلم والنفرات وسترات النجاة. أنا ما عندي صبر ولا طاقة للإنتظار. رح أخطبِكْ من أهلِكْ مع أني ما بحب العادات والتقاليد البالية. بس بعرف أنك محبوسة بقفص العائلة. وبالتالي طلعتك برضا ولي أمرِكْ صارت مهمتي. ما بدي احمّلِكْ ذنب الخروج عن طوعهن.
شو؟.. المتقدم والمتأخر؟ المهر قصدك يا غالية؟ مهرِك يا غالية غالي. مهرِك لَمّ شمل. نعم.. لَمّ شمل. رح أبعتلك اياه لعندك. هو متقدمِك ومتأخرِك… شلون؟
ما فهمت.. ليش بدنا نتخانق حبيبتي؟ إي هون إذا تخانقنا ما في داعي تحردي لبيت أهلِك. الحكومة هون أمك وأبوكِ وأخوكِ. بتليفون واحد بيشحطوني لبرة البيت كرمالِك يا قلبي.
شلون؟ الطلاق؟! طلاق شو بعيد عننا. يعني قصدِك مثلاً مثلاً؟ إي كمان الحكومة هون أبوكِ وأمِك وأخوكِ. بيقلعوني برة البيت فوراً كرمالِك يا روحي. وشرطِك الأولاد بيضلوا معِك. ما بيطلعلي أستخدمهن مشان أقهرِك. ولا بيطلعلي أحرمِك منهن مشان أنتقم منِّك. لأ.. هون يا قلبي أنتِ ملكة. ملكة نفسك. مع أني برضاتي معيّنِك ملكة على قلبي.
بس مشان تطمني أكتر حبيبتي لازم تعرفي أنو أنا والحكومة الألمانية بنحبِّك. بتعرفي هنن أهلي كمان. يعني فيكِ تعتبري الحكومة بيت حماكِ. وماما ميركل حماتِك. عفواً أمِّك. اعتبريها متل أمِّك وأعز. بقى شو قلتِ؟ نقرا الفاتحة على نية تقديم اوراق لم شملِك بكرة؟
بووووم..
ـ شوها الصوت حياتي؟
ـ ما في شي.. لا يكون لَك فكر حبيبي.. برميل نزل ع البناية اللي جنبنا؟
ـ وشو رح تعملوا؟
ـ ولا شي.. بنقرا الفاتحة.
المدن
