الرئيسية / صفحات المستقبل / و لسا بينبعصوا!

و لسا بينبعصوا!

 


لا حول و لا قوة الا بالله…..ما بعرف شو بدي قول….انو سمعت الخطاب…ابتسمت و رحت نمت… فقت لشوف الصدمات و حالات الانفلاج و انو في عالم قال لهلأ عم ينصدمو و ينبعصو من الحكومة العتيدة و ابونا القائد….

صرلي اسبوع عم اقرا تكهنات و توقعات و تحليلات و شو بدو يحكو هالاب القائد… و قال بدو يكمل ولايتو للالفين و اربطعش و خلص و قال اخوه ماهر لانو تركيا ضغطت و قال بدو يقدم حزمة اصلاحات اخت محلوشة…. و بدو ياخدو قرارات حازمة و حاسمة…. و بدو يعمل و خلص لانو يعني الوضع صار سئ و قصة سوريا و لا جئيها صارت على كل لسان و شوية تانية بيعملولها كليب عالام تي في…انو خلص معناها في احتمال انو هالاب القائد يتخذ هيك خطوة….هيك كتير كانو عم يحكو…و حتى يلي ما عم يحكو…جواتهون كانو متوقعين شي…انو اي شي….

بتمر هالايام…و بيجي هالقائد بيبعصهون و بيأكد على كلام العدوين و كلامي على انو مو عرفان وين الله حاطو…

اول شي ذاكرتنا صايرة قصيرة الامد متل السمك….انو كل يوم مننسى شو صار قبل بيوم…هلأ السمك بيساوي هيك لانو سمك يعني شو بدو يساوي مثلا؟…نحن منساوي هيك من باب الامل و منشان ما ننجلط…و لاننا منفترض انو الانسان عندو نزعة فطرية لعمل الصواب او يلي منعتبرو صواب…انو حلو الامل…. شو نحنا اذا ما حلمنا او اتأملنا و تمنينا شغلات حلوة تصير لما نصحى من النوم….هيك نحن…

بس لما بتجي القصة لموضوع الاب القائد و النظام و البلد….ما لازم نكون سمك بنوب…

انو الشغلة الاساسية يلي نحنا طول عمرنا منرددها و مالنا فهمانين معناها هي قصة الخطاب التاريخي…. يعني كل خطابات اسود سوريا تعتبر تاريخية…على حكي الاعلام الوطني و كتب القومية و المحلحلين السياسيين السوريين….بشار لحالو عندو شي تلات اربع خطابات تاريخية…و هلأ لو لا المخربين و المؤامرة كان الاعلام الوطني ما تورع عن تسميتو خطاب تاريخي….

هلأ شلون بدي قول…. انو هنن ما عم يكذبو علينا…هنن عم يقولو تاريخي و يوقفو…و نحنا منبني شغلات على اساس كلمة تاريخي…الغلط انو نحنا عم ننظر لكلمة تاريخي على انها صفة للخطاب…بينما المفروض نشوفها انو هي تصنيف…. يعني مثلا لو طلع بشار و قال بدنا من هون لعشر سنين نخترع سيارات بتمشي عالهوا…او انو من هون لخمس سنين بدنا نوصل سوري على القمر و ليحط صورة الاب القائد…. هلأ هيك خطاب اذا بدنا نوصفو…منوصفو بأنو خطاب مسخرة…بس اذا بدنا نصنفو…منصفو كخطاب خيال علمي…. فمنشان هيك ما بيصير نتوقع اي شي من خطاب تاريخي لانو ببساطة رح يحكي عن شغلات تاريخية اكل الدهر عليها و شرب…. انو تاريخي…شيه!

هلأ بعيدا عن اللغة و دخاليجها…اي واحد سمع الخطاب…بيقول انو طيب شو الجديد؟ فهون الجواب بيكون انو قلنالك هدا خطاب تاريخي…. يعني انا كمواطن سوري كل فترة و فترة بنسى عن المؤامرات يلي عم تعصف بسوريا من طول عمرها…فبدي خطاب تاريخي كل فترة يذكرني فيها…لانو مثلا لو عطونا خطاب واقعي…رح ننسى المؤامرة و ننتبه لواقعنا الخرى…فمنشان هيك الخطابات عم تتراوح ما بين تاريخية و كوميدية بالاحيان حفاظا على الوحدة الوطنية تحت رجلين النظام

فالفكرة انو معليش يا ناس لا تتفاجئو و لا تنبعصو…و اذا اتفاجئت او انبعصت معناتك غشيم بمعرفتك للنظام الحاكم بسوريا…بالاضافة لاحتمال وجود مشكلة عاطفية عندك متل كأنك عاشق ولهان بس حبيبتك رافستك…و لسا عندك امل انها ترجعك…فهل الشي خلق عندك حالة امل مستفحل بكلشي..انو كل ما بيرن تلفون…بتفكرها متصلة تقول شغلة على كيفك…علما انو هي صرلها سنين عم ترفسك و مستبيحة عيلتك و حارتك…

لو بشار كان في عندو ذرة فهم و ذرة انسانية متل ما كتير عالم بتفكر…كنا ما سمعنا خطاب اليوم…و كان خطابو الاول هو الكافي…بس من وقت الخطاب الاول و الزلمة كان جدا صريح وواضح…و بالفعل الزلمة نفذ…هدد بالحرب على المخربين و شفنا الجيش السوري مفروش بنص المدن السورية….الزلمة وفى بوعدو…قال في لجان لدراسة الاصلاح…ليكو في لجان و عم يدرسو…لو كان بدو يساوي الشي المطلوب يلي هو تحرير سوريا من قبضة العصابة الواحدة…هالشي رح يكون على حساب مصالحو الشخصية…يلي عم يحكي عنها بشكل متلازم مع كلمة الوطن…يعني كلشي حكاه اليوم صحيح مية بالمية اذا منبدل كلمة سوريا و الوطن بكلمة الاسد و عيلتو…ساعتها يا لطيف شو في متأمرين عليهون….و هو بيعرف هالشي….اساسا هو لما بيقول مخربين..هنن عن جد مخربين لسمعتو مو متظاهرين..منشان هيك اليوم قال انو اجتمع بألاف من المواطنين…و تفاجا بحبهون لشخصو الكريم…….فالزلمة ما عم يحكي شي خطأ…بس انو هو بيقصد شي و نحنا منفكرو عم يقصد شي تاني…فالقصة كلها لا مؤامرة و لا ضرطي…القصة قصة سوء تفاهم و مشي الحال بعد ما سيادتو اجتمع مع الاف السوريين و مخاوفو بأنو السوريين بيكرهوه تبددت….و بعت تحية عالهوا لارباط الجيش السوري الالكتروني…يعني الزلمة بلش يغير نظرتو فينا…و هالشي كتير مهم…يعني بأذن الله من هون لعشر سنين من الثورة…بيجتمع مع مئات الالوف من المواطنين يلي رح يطمنوه بحبهون….و الباقي بيكونو تهجرو على تركيا و لبنان و الاردن و العراق و المقابر جماعية….و ساعتها القيادة بتكون متأكدة بعد لقائاتها مع الشعب من حب الشعب الها و بتسحب الجيش على الثكنات و رجال الامن الى مكاتبهون….

الزلمة عم يتصرف من جهتو…يعني ليش بدي اتوقع شي اكتر منو؟ يعني لا انا و لا انتو انتخبناه و تسعين بالمية من الامور ببلدنا مو عاجبة اغلبيتنا……فليش عم نتوقع انو مصلحتنا هي من مصلحتو او العكس صحيح؟  الزلمة جاية من عيلة فيها دكتاتور خالد و عم مجرم حرب…و مستلم ورتة ابوه…. و عم يديرها بالشكل الانسب لمصلحة الشير هولدرز يلي هنن عيلتو و دنابهون….فشو منتوقع يعني؟

هلأ الشغلا يلي حسيت فينا نستشفها هي كالاتي:

– في ضعف بكلامو و بطريقة حكيو و تعابيرو و حركاتو اذا بتتقارن بأي خطاب سابق بتشوفو الفرق….ثم اصرارو على عدم توجيه خطاب متلفز موجه للشعب متل اي رئيس بيحترم حالو وعدم قدرتو على مخاطبة الشعب بدون فواصل تصفيقية او جمهور بيأكد هالشي…و خصوصا انو بعمر النظام بسوريا من 48 سنة ما كان بمشكلة كبيرة متل اليوم…..بس انو هو مصر ما يساوي متل ما ساوا مبارك و بن علي…لساتو عم يفرض على حالو حالة من الرفض للواقع…

– ما تعمق كتير بالمؤامرة  و الدليل الوحيد يلي حكاه عن وجود مؤامرة هو انو سوريا من طول عمرها بتتعرض لمؤمرات…انو رئيس دولة عم يتعرض على مؤامرة ما رح يتوانى عن طرح اي دليل على تورط جهات بأسمائها و خصوصا انو هالنظام عم يوجه الخطاب للغرب اكتر مالو موجهو للشعب….فمنشان هيك المؤامرة كان الكلام عنها عام…هلأ اذا بتشوفو انو كلشي ابطال مؤامرات سمعنا عنهون من وقت ما بلشت الثورة و كل قصص تورط دول و غواصات هي قصص طلعت من على موقع اسرائيلي او غيرها من المواقع يلي مالها اي جهة رسمية معروفة وراها…..يعني هيك موقع عالانترنت حط رواية مالها اي مصداقية غير انو مصادر مقربة على زعمهون…تاني اليوم الشعب السوري تبنى القصة و صار يحلل و يربط…و اجو المحللين السياسيين السوريين اتبنو هالقصص…بينما الحكومة و موقفها الرسمي ما ذكرت اي شي و لا تبنت اي اتهام لاي جهة….و بس حكا  انو في مؤامرة بالشكل المبهم….أنو دولة بسطعش جهاز امن و اعتقال 10 الاف مواطن سوري و قتلو 1500 و لسا ما قدرو يجيبو دليل ليشيرو لاصابع الاتهام لجهة معينة منشان يخففو الضغط الدولي المتزايد…معناها انو بلا مؤامرة بلا خرى….فمنشان هيك ما استسهب بالحكي عن القصة..

– اكتر كلمة اتكررت او بالاحرى عبارة هي انو اجتمع مع وفود شعبية….انذكرت بالخطاب يمكن اكتر ما انذكر اسم الله بالقرأن…و اكد انو هلأ صار عندو فكرة و انو منشان ما تقولو الحاشية تبعي عم تحاشي عني…هي انا بنفسي حكيت مع المئات و الالاف منكون….و صرت بعرف وجعكون….يعني فكرو انو لما رئيس بيجي بيقول هالكلام بعد ايدعشر سنة من الحكم بيكون مبيض وش و متل يلي مقضى غرض و المفروض المواطن يبتسم و يعتز و يرجع يطوبز بعد هالكلام….يعني عم يعترف انو ما لو عرفان شو الشعب بدو و انو هي اول مرة بيعرف بهل القصص….هلأ لنفرض هالحكي صحيح…..فيعني مو رجلي بهيك رئيس ليش عم يحكمني؟

– لهجتو كانت حادة بأتجاه المتأمرين يلي بالداخل او ما سماهون الجراثيم….اي كي اي المتظاهرين و المندسين سابقا…و قبلها السلفيين و البندريين و الفلتمانيين و الحريريين…و لسا عندو مشكلة مع هالهواتف المتطورة يلي يمكن عم يستعمولها لفبركة الوقائع و الفيديوهات

– ما ذكر اي شي عن الامن و الشبيحة على انهون احد اكبر المشاكل….كأنو هالكم الف واحد يلي اجتمع معون ما قالولو شو عم يصير بالشارع..و هو ما بيعرف على حسب العالم يلي بيقولو ايه انو ماهر الغول هو فارض على بشار الكتكوت رقابة و ما عم يخليه يحكي عالتلفون مع بوكي مون و غيرو..و فبيجوز ماعندو علم.. وما عندو انترنت من عشر سنين و مرتو محرمة الستلايت بالبيت و رفقاتو بس شغل سيارات و موبايلات و ما بيحكو سياسة… …بس  انو هو متابع القصص يلي بالشارع بدليل انو حب يطمنا انو كلشي عم ينحكى عن خناقتو مع مرتو و اخواتو و حماتو هي محض اشاعات و كذب و كلهون بيحبو بعض…وانو اذا متوقعين انو بعمل متل ما عمل المرحوم و يحلق لاخوه فهيهات هيهات…فالزلمة دريان شوفي عالارض و عرفان شو صاير منشان اذا حدا مفترض انو بركي ….فيعني معقول انو ما شاف او دري بهل الفين فيديو يلي مافيهون شك بمصداقيتهون و فيهون رجالو عم يكسرر سيارات و عالم و يقتلو و يهينو و فلتانين عالشعب…و بس حب يوضحلنا عن حالة التلاحم العائلي…فالعبرة هون انو انا و اخي على ابن عمنا و الشعب و هيك بدو يصير و هيك الامور بدها تمشي…و يلي مو عاجبو…في اكتر من 190 بلد بالعالم…

– حرفيا ذكر انهيار الاقتصاد السوري و شبه قطع ايدو و شحد عليها….و هون في 3 استشفافات..الاولى انو الخزينة عم تفضى و التمويل عم يخف و هالشي رح يفتح على النظام باب جهنم من غير جهة…التانية تأكيد فضل حماة الليرة السورية و ان حكى على ابو الالف…بس الغاية هي ابو الروم الحنون…..يعني جزء من حملة التبييض يلي شغالين فيها…. تالت شي انو شغلة استباقية و تحذيرية…يعني عم يخوف العالم من تبعات الاستمرار بالثورة…و بنفس الوقت استباقي في حال زبطت معو و نفد…رح يكون في عندو شماعة يعلق عليها فشل السياسات الاقتصادية لعشر سنين لقدام….

هلأ غير هيك كلشي انحكى هو تاريخي و مالو طعمة…و مافينا نستشف منو اي شي بطعمة..و اساسا نسيت شو حكا…و وجعوني اصابيعي من الكتابة بكل الاحوال و بدي قوم اجلي هالجليات و شوف شي منّش عليه لانو جعت..

بناءا على الاستشفافات اعلاه فينا نتنبئ بتصعيد امني اكتر…و خصوصا لهجتو كانت قاسية للضرسان وقت حكا عن المخربين لسمتعو… و رح يستمر بألتعامل مع الثورة بعقلية ابوه بالتمانينات….و الشعب عم يتعبى و ينضغط…و رح تجي التيبينغ بوينت من الشام او حلب و يصرلو شي مجزرة صغيرة بشكل غير مقصود و تفلت القصة و ساعتها الغرب بيكون وصل لمرحلة توافقية بخصوص سوريا و جاهزين يتدخلو بأي شكل او بأخر بضغط من تركيا…و بهل الفترة الحسم بيكون بايد جزء من الجيش…لانو رح يوصل النظام لنقطة ضعف رح تخلي كتير من المؤيدين العسكريين و المدنيين ينطو من السفينة الغرقانة…شغلة مصالح و استمرارية وجود مو اكتر….فحسب شو في معطيات وقتها بتتغير المواقف و الامور…..يعني مافي شك انو النظام انتهى…بس ما رح نشوف ابو البيش او سكرتيرتو عم يقولو انو هو رح يستقيل….و بالتالي اللعب مفتوح عالاخير و كلشي وارد…..

و بالنظر لطريقة تعامل النظام مع القصة و خطابو الغبي اليوم…فهالشي بيخوف اكتر من لو كان خطابو في تنازلات او ذكي بفرنكين على الاقل….لانو مافي شي بخوف اكتر من واحد فوق ما انو جحش و دموي..غبي كمان…بس الغباء هو سلاح ذو حد واحد..و اخرتها رح يجرح الولد يلي عم يلعب فيه…

مع كل خطاب…عم نزداد قناعة العالم بغباء النظام  يلي عم يحكما…و عم تزداد الثقة بأنو الشعب انو واعي و سلمي على الرغم من مواجهتو احد اعتى الانظمة الشمولية و اكثرها اجراما و النظام عم يحاول يجر الشعب للطائفية و العنف..بس لسا الشعب عم يتوحد اكتر مع بعض و سلمية حتى الموت…..و يمكن هادا اكتر و اهم استشفاف فينا ناخدو من هالخطاب….فشكرا سيادة الرئيس

http://hashashji.wordpress.com/

 

اضف رد

لن يتم نشر البريد الإلكتروني . الحقول المطلوبة مشار لها بـ *

*

54 + = 62

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

x

‎قد يُعجبك أيضاً

فيينا تحذف سوتشي/ إياد الجعفري

    فشلت المقايضة بين فيينا وسوتشي، التي جرت بين الغرب وروسيا، في تحقيق تفاهم ...