صفحات المستقبل

اللي بيسرق شعبو…. خاين!


– عالعوافي لك خاي.

– الله يعافيك, لك شبو وشك ما بيتفسر.

– الحمد لله على كل حال, بس مزعوج وضايج.

– له له, خير شو في.

– قال الكتيبة العلتانية اللي قائدها فلان, مساوين حالن جيش حر ورايحين مفككين معمل بالشيخ نجار لتاجر بحجة أنو شبيح كلب مع النظام وعميخزنوهم بمخازن بالمنطقة الصناعية عنا منشان يوردوهم بعدين لبرة البلد.

– اي بس هاد شبيح.

– كيف يعني شبيح؟ مانو مواطن سوري متلي متلك؟

– اي مواطن مواطن بس أنو أكيد عبيدعم النظام, بعدين لا تنسى أنو لو ما كان متعاون مع النظام كان لا بنى هالمعمل ولا صار وتصوّر من أساسو.

– أنت ماسك عليه شي للرجال؟ كل هالكلام الفاضي هو محض افتراضات, بس يسقط النظام اذا حدا لاقط عليه شي بيتقدم لمحاكمة عادلة, نحن بدنا نبني دولة القانون والمؤسسات, ما بدنا نعمل بشريعة الغاب كل واحد شاف خطأ يعمل حالو حكم وقاضي ويبت بالحكم من عقلو.

– طب خلص أخي اتفقت معك هاد عمل غير لائق ومشين كمان بس أنو ليك خاي أوعى تجيب سيرة لحدا, بيضل هاد أسمو من الجيش الحر ويعني بتعرف أنت ما بدنا نوسخ بسمعتو.

– لا خاي ما حزرت, أولا هاد مو من الجيش الحر لأنو عبيوسخ سمعتو وعبيسرق, تاني شي بدي أنتقدوا وعلى العلن, لأنو حكينا ونصحنا مية مرة بالسر, السرقة مو من شيم الجيش الحر ولا من شيم الكرام, اللي عبيسرق هلأ مصنع بكرة بيسرق دولة بأكملها, نحن ما بدنا نطلع من جورة نقع بجورة تانية, نحن طلعنا لنقضي على الفساد, ما بدنا يطلعنا فساد من نوع تاني, بعدين لا تنسى أنو شعبنا للأسف فيو ناس ما تربت لا على أخلاق ولا على دين ولا دخلت مدرسة تتعلم لأنو ما عندها تتعلم, بس من جواتو انسان بيحب النخوة ولما شاف أخوه عمبينقتل دفعتو الحمية وما رضي بالذل والهوان وانتخى, هاد حمل سلاح, بس ما معو فكر, وظيفتي أنا وأنت ننبهوا على الغلط, لعل وعسى الله ينورلو بصيرتو وتكون هالثورة مدرسة الو.

– اي بس لا تنسى أنو في هدف أساسي هو اسقاط النظام, لازم نسعى إلو وما نلتفت لهالشغلات الجانبية!

– شوف خاي النظام هو مو بشار الأسد وأعوانو, النظام هو الفساد والمحسوبيات وقمع الحريات, النظام هو السجن التعسفي, النظام هو تفضيل ناس على ناس بس لأنن من “جماعتنا”, النظام هو السكوت عن الغلط لأنو “ولو هاد فلان اللي كان أبوه هيك, أو فلان اللي واسطتو هيك”, النظام الحالي هو انتفاء العدالة الاجتماعية, النظام الحالي هو سرقة مقدرات البلد وحصرها بشخص رامي مخلوف تاجر العصابة الكبير والرئيس التنفيذي تبعها, وشاليش ومن لف لفهم, الثورة اللي ما بتترافق بتغيير بالأفكار وصحوة مجتمعية ما اسمها ثورة, هدفنا من لما طلعنا ما كان راس بشار, هدفنا كان قيم نبيلة لازم تتحقق لكل انسان مواطن مين ما كان وكيف ما كان.

– طب فهمت فهمت, بس أنو يا أخي شوف الطرف التاني, الجيش والأمن لما عبيدخلو على بيوتنا عبيسرقوها وينهبوها ويعتدوا على أعراضنا, و كمان….

– بس وقف لا تكمل عرفان اش بدك تقول, خيو بيقولوا لا تنهى عن فعل وتأتي بمثله عار عليك إذا فعلت عظيمُ, لازم نعامل الناس بأخلاقنا مو بأخلاقهم, للأسف هنن حطوا حالن عدو للشعب ونسيوا أنو هالشعب هو خين, بين, خيتن وميمتن, هنن ما عندن أخلاق, هنن الماضي, نحن الشعب نحن الحاضر والمستقبل, نحن اللي لازم نكون أصحاب الأخلاق لأنو الحكم للشعب أولا وأخيرا.

– بس…بس… (صمت)

– بس شو؟ مافي شي بيخلينا ندافع عن الغلط ونلاقيلو مبررات, تعا بما أنو إسمك فاضي وفاضي, تعا عاوني نحضر هاللافتة لمظاهرة الجمعة.

– شو بدك تكتب فيها؟

– اللي بيسرق شعبو….خاين!.

– ومين ما كان كمان 🙂

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

زر الذهاب إلى الأعلى