صفحات الناسلقمان ديركي

بلاش تبكي ببلاش/ لقمان ديركي

 

 

ما أروع أن تملك الرأي السديد بعد ثوان من الحدث. ما أحلى ان تكون صاحب موقف بعد لحظات من الخبر. ما أجمل هذه الأشياء، وما اقوى هذه الثورة المحظيّة بكل تلك الآراء والمواقف.

فعلاً محظية هالثورة يا أبو شريك. انو يمكن الثورة الفرنسية بجلالة قدرها وطول مدتها ما صحلها هيك سحِّيبة مواقف ولا هيك شلِّيفة آراء. قال يعني لازم هالحمار يكون له رأي. لأ وهو مفكر أنو الفايسبوك بس أله بيقول بمَ تفكر؟ بقى بمَ تفكر يا طويل العمر؟! وايش رأيك باللي صار؟! ألك مصلحة تبيض شوي بموضوع الأقفاص؟! شغال ترى ها. والا  بتحب تاخد وتعطي بموضوع الغرقى؟! شوف وين جوك وترتيبك ولعيونك.

وبالحالتين مو مشكلة. أنت تبدي رأيك ونحن ننشر. صحيح انو الناس ببلدك شي مات وشي تشرد وشي تعتر وشي تمرمر وشي داق الويل. لكن الصحيح أيضاً ان فرص العمل ازدادت على مستوى حرية الرأي. هلأ مو الشعب كان بده حرية الرأي؟! مو كان بده حرية التعبير؟! مو كان بده حرية اتخاذ المواقف؟! إي شرفوا تفضلوا.

هي صار عندكن كل هدول. ومع أجر كمان. صار فيك تاخد الموقف اللي بدك اياه مقابل أجر. صار فيك تقول الرأي اللي بدك اياه مقابل أجر. لك حتى صار فيك تبكي وتجعر مقابل أجر. صارت الحرية بجيبتك. قصدي صارت معبيتلك جيبتك. بقى شو بده مثقفنا الحبيب أكتر من هيك؟!

بس أنت كتّر له شهداء وشوفه. معلم بالرأي. بطل بالمواقف. عّ القاعد وعّ الواقف. وعّ المتسطح طبعاً. ظهر صدر فراشة. مسافات قصيرة ومسافات طويلة. اللي بدك اياه. لكل شهيد ألف شاعر. لكل قتيل ألف محلل. لكل أسير ألف مطالب. لكل متبهدل ألف مؤتمر. لكل معتر ألف اجتماع. وكله ماااع. بعد حسن الإستماع.

عم تتعب كتير يا أخي. طيب لا بقى تزودها على حالك أنت التاني. مو ضروري كل نقطة دم تدلق وراها محبرة. مو ضروري كل شهيد تغسله بدموعك الإفتراضية. وما في داعي كلما دق الكوز بالجرة تفهم العالم أديش أنك بتحبه لعلم الثورة. ريحه شوي للعلم أبو تلات نجمات. حرام. هلك من قد ما رفرف. وخايف تهر منه نجمة ع قد ما عم يرفرف بكتاباتك وإبداعاتك ويصير بنجمتين بس. متله متل العلم اللي ما يتسماش. علم الوطن اللي من سقفه وأنت ونازل.

لا.. هزلت. أنت علمك بتلات نجمات. وسبق ورفعته بكل المحافل والتجمعات. وأله عندك معزة خاصة. لدرجة أنك ما بتنام إلا وأنت متدثر فيه. عجبتك متدثر هي مو هيك؟! ههههه.. بعرفك بتحب الكلمات المنتقاة. بس والله مو مشان شي. مشانك. يعني قلبي عليك. لا تعطي على حالك كتير يا خاي. لا تجور. صحيح أنو الشعب  دمه مهدور . بس أنت للأمانة دموعك مو ببلاش. بقى بلاش تبكي ببلاش .. بلاش.

المدن

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

زر الذهاب إلى الأعلى