صفحات الناسلقمان ديركي

كذلك حدثَّني الضيف/ لقمان ديركي

 

 

ليش قاعد لوحدك متل واحد آكل قتلة؟! طَوِّل بالَك. روق. خدلَكْ كازوزة. تشرب شاي؟! شو رأيك بسيكارة؟!

لك رَوّقنا ولُو، شو صار يعني! كلها خبطتين تلاتة، والضربة اللي ما بتكسرك بتقويك، لكان أبو شريك، اسمع مني وخدلك سحبة، خدلك شفة طيب، طيب شو رأيك تطلع نغير جو؟! بنشربلنا شي كاس برة، بلكي بتروق، بعرف مطعم ظريف هون، لقمته طيبة، قوم خلينا نروح، يالله حركلي حالك يا زلمة شوي، احلق دقنك واعمل دوش وليكني أنا ناطرك ورح أجليلك الجليات لبين ما تخلص دوش وتحلق دقنك، ما بدَّك؟!

طيب لا تحلق دقنك بس قوم تحمَّم عالأقل، مو مشان شي بس مشان تنتعش، بكرة باخدك عالحلاق يعمل لك راس ودقن ورح تشوف الدنية غير، لكان أبو شريك، لازم تنتفض، لازم تطلع من القمقم، .. مانَك مارد؟! إي طيب باعتبارك مانَك مارد متل ما عم تقول لكان ليش حاطط حالك بالقمقم؟! ليش خانق حالك بهالغرفة يا أبو شريك؟ صحيح باعتبارك مثقف شو يعني قمقم؟!

قوم خلّصنا، لا تهكل هم البلد، ما بيطلع بإيدك شي، ولا أنا حتى بيطلع بإيدي شي، قوم لك قوم، خلصنا بقى وبلا مقت، بعدين احمد ربك أنك برة البلد، يعني بصراحة اللي جوة بيحسدك عالقعدة برة، بتعرف يعني شو يعني؟!

يعني ما في داعي نغمق بالحديث، خيو بصراحة رجلك بالسياسة، قوم بقى بلا تياسة، خلينا ننبسط بأوروبا شوي، انحسبت علينا أوروبا وأنت مقضيها نكد وحزن، قوم لآخدك عالسوق، خلينا نغيرلك اللوك، بدك بنطلون جديد عالموضة وجاكيت أكابرلي، كمان بدك صباط جديد، قوم أنا عازمك على كسوة مرتبة بس على شرط، لازم آخدك عالحلاق ويعمل لك راس ودقن، بلاها الدقن، بتكئب ولو خلينا نشيلها، والشعر الطويل صار بايخ، ما ضل حدا ما عم يطول شعره، ….إي فهمت عليك، يعني بس مشان أجرة الحلاق؟!

إي غالية معك حق، بس أنت كمان عم تقرشها عالسوري، كلهن عشرين يورو راس ودقن وبترجع خلنج مراهق، خلص قوم لا تهكل هم الأجرة، أبي بزمانه قال لي: أنت مشكلتك المصاري؟! إي معناها ما عندك مشكلة. قوم خلينا نروح عالبحيرات، بنشتري خبزة بيورو وبنطعميها للبط، ما بدك تروح عالبحيرة! طيب والخبزة؟! ماشي ماشي بنروح عالساحة تبع الكاتدرائية وبنقعد تحت هالشمسات الحلوين وبنطعميها للحمام، لك صحيح شو يعني كاتدرائية؟!

ما عندك بسكليتة؟! طيب قوم خلينا نستأجر بسكليتتين ونطلع كزدورة ناح النهر، الهوا هنيك بينعش القلب وبينضف الصدر، خلص ماشي ما بنروح عالنهر خيو، أحسن الشي نحضر لنا فلم سينما، في أفلام حلوة ترى بسينما ضيعتكن، مو مترجمة للعربي؟! إي معلوم مو مترجمة، طيب خلص لكان اقعد وحطلنا شي فلم عاليوتيوب يكون مترجم وخلينا نتفرج.

عندك بيرة؟!

المدن

 

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

زر الذهاب إلى الأعلى