ما بهم طالما رح ينتخبو الشعب
ما بهم طالما صناديق الاقتراع رح تحدد مين هو
ما بهم طالما رح يقّضي الفترة الانتخابية بخدمة البلد و بعدين رح يمشي إلا اذا الشعب قرر يمددلو بحسب ما بنص الدستور
ما بهم طالما مارح يسمي الشوارع و المدارس و المعاهد و المؤسسات و الجوامع باسم امو و ابوه و اخوه و ابنو
ما بهم طالما رح يحترم الديموقراطية
ما بهم طالما رح يحافظ عالنظام الجمهوري
ما بهم طالما ما رح يورث الحكم لاخوه او لابنو
ما بهم طالما مارح نشفلو و لا تمثال بشوارع سوريا
ما بهم طالما مارح نشوف صورو كل ما اتلفتنا يمين و يسار
ما بهم طالما رح يحكم بالقانون و الدستور
ما بهم طالما رح يتحاسب عالكبيرة و الصغيرة ……….
يعني اذا اجتو جلطة للرئيس الحالي و مات شو بصير بسوريا و بالشعب بتوئف الحياة او بنموت معو
بالداخل 23 مليون سوري و 20 مليون متغرب ماحدى في مخ و مؤهل غير بشار
أي حدى مؤهل ممكن يحكم
أنت او انا أخي او أخوك أبي أو أبوك و يمكن أمك كمان
يمكن جاركم يمكن دكتورك بالجامعة يمكن وزير شريف يمكن قاضي منيح يمكن ضابط نضيف
مسلم مسيحي علوي سني سماعيلي درزي ما بهم طالما رح يحكم بالقانون و مو بالعقيدة تبعو ……….
مو النظام يلي حامي الأقليات و لا هو يلي مانع حصول حرب أهلية
سوريا عمرها آلاف السنين مو أربعين سنة بس
هالاختلاط الجميل بين الطوائف و الأطياف موجود بسوريا من بداية البشرية
سلطان باشا الأطرش و الشيخ صالح العلي و ابراهيم هنانو و فارس الخوري و يوسف العظمة
اسماء سورية عظيمة من القرن الماضي .
شو كانت طائفتن ؟ شو كان انتماؤن ؟
كانو سوريين و بس
كان الانتماء لسوريا و العقيدة كانت الوطن
و هلأ نفس الشي
كلنا سوريين و كلنا تحت سئف الوطن
كلنا مجتمعين و مافي شي بفرئنا
بكل افكارنا و عقائدنا و تطلعاتنا
سوريا بدها حرية و نحن بدنا حرية …………..
و بالنسبة للمانعة و الصمود
الشعب الممانع هو من يصنع النظام الممانع و ليس العكس
النظام ما بيئدر يمانع و يقاوم بشعب خانع و خايف و مسلوب الكرامة
ما بيئدر يقاوم العدو الخارجي و الشعب جوعان
المفروض قبل ما يلتفت النظام للجبهة الخارجية يتاكد انو الجبهة الداخلية معو و داعمتو و مو ناقصن شي
هدا غير عن قضية بيع الجولان و عن معاهدة السلام مع العدو من سنة الأربعة و سبعين
عشنا اربعين سنة عم نحضر لحرب مع عدو غير موجود
عدو للشعب بس صديق للنظام
و بالأخير هالتحضيرات استخدمت ضد الشعب
لك اهل فلسطين سامحونا
و قالو ما بدنا هالمقاومة من سوريا اذا الشعب السوري يلي رح يدفع التمن
الفلسطينيين عم ينقتلو بإيدين اعداؤن
بس السوريين عم ينتقتلو بإيدين اولاد بلدن …………..
و اذا خايفين يجينا حرامي
يا عيني مارح يحكمنا النبي و لا الرب و لا المسيح
اساساً المشكلة انو يلي حاكمينا هلأ مفكرين حالن الرب الأعلى
بس يلي رح يحكمنا بعدن بني ادم متلو متلنا
و في حال سرق و خبص
في مين يحاسبو في مين وائف فوق راسو عم يراقب الكبيرة و الصغيرة
و أد ما سرق و نهب رح يكون عالهسي و المخفي مو عالعلن متل هلاء , عم نسرئكم و روحو اشتكو و أعلى ما بخيلكم اركبو
الرئيس الجاية رح يكون موظف عند الدولة و عندو راتب و بس
لازم يحط مخطط و جدول زمني للخطة المرسومة لسوريا خلال فترة الحكم و الشعب رح يرائب
و اذا خايفين من نظام استبدادي قمعي جديد
اتأكدو انو الشعب يلي ئدر يأسقط النظام الأسدي البشع ئادر انو يأسقط اي نظام استبدادي تاني
و يلي رح يحكم رح يحسب هالحساب كتير منيح
رح يكون في فصل للسلطات القضائية و التشريعية و التنفيذية
يعني القضاء بيحاسب البرلمان و الرؤساء بس هنن ما بيحاسبوه
يعني مو الرئيس هو اللي بيحط القوانين والتشريعات
في شي اسمو مجلس شعب واستفتاء بيتحدد بقرار شعبي
والجهة اللي بدها تنفذ وزارت وادارة محلية واشيا تانية ملزمة بالقضاء متل مو ملزمة بالتشريع
و الرئيس رح يكون مراقب بيتأكد انو السلطة التنفيذية عم تشوف شغلها
يعني مارح يحكم لحالو
مارح يكون الآمر الناهي
مارح يكون صاحب القرار الوحيد
الدولة رح تشاركو القرار
بالنهاية
يلي رح يحكمنا بعد هالنظام هنن
القانون و الدستور و الشعب
Anas Kamikaze
http://the-syrian.com/archives/42531
