هلأ سوق الحرامية ما عاد أله محل واحد محدد. صار وين ما بدك. برة وجوة. كله عم يشفط ويبيع. اللي بدهن يبيعوا اغراضهن باعوها. واللي ما بدهن يبيعوا اجا مين يشفطها منهن ويبيعها. يعني من الآخر أبو شريك البلد انباعت. ومو بس هيك. لأ.. كل شي بيخصها حتى انباع. مال نهيب. بتعرفه لمال النهيب؟!
إي هيك وضعنا هلأ. النهب شغال. والهبش على أبو موزة. هاد اللي هبش لحاله تاريخ مشرف من قيد النفوس. وهاد اللي نتش لحاله سيرة محمودة من وزارة الداخلية. وهاد اللي جاب معه شهادة مناضل من فروع الأمن، مختومة شي بختم مساعد أول. وشي بختم عنصر مخابرات رفيع. وشي مختوم بختم تبع كبار الضباط.
أنت في سوريا. التاريخ ملك إيديك. من لا حكم عليه. مروراً بشهادة البكالوريا. وانتهاءً بشهادة شهيد ركن ميت التعذيب. صار من السهل تشوف المجرم شهيد. وتلاقي الطلطميس جهبذ. وتتفاجأ أنو العوايني طلع ثائر. وكله معه شهادات. وكله جاهز ليدلي بدلوه بالمؤتمرات. وعنده استعداد عن طيب خاطر ليشارك بالمفاوضات.
وصار في عنا ألعاب وبرامج جديدة. تزلج على الدماء. وتبادل وجهات النظر فوق ركام الحياة. صار في عنا تجار من كل الأنواع. بس بيبقى تاجر الشنطة هو الماركة الأكثر تسجيلاً باسمنا. صرنا ملوك تجارة سلم واستلم. وناولني لاناولك. اشتهيتلك هالقطعة الأثرية. من الحضارة البابلية. بعرفك خواجة وبتحب الحضارات. وصراع الحضارات. اشتهيتلك هالحجر من العصر الحجري. أيام ما كان الإنسان حيوان بردان. ولسه في تشكيلة أوسع عالحدود.
شرفنا شي نهارعلى تركيا. وإذا بدك تفضل معنا عالجواني. بنبيعك عالخريطة. لأ وإذا بدك بنفصل لك خريطة. والأسعار متهاودة. متل ما بتعرف سوق الحرامية مكسورة فيه كل الأسعار. وبنهديك فوق البضاعة قصائد وأشعار. لأنو الأناقة بالبيعة أهم شي. بتعرفنا نحنا النخبة. ما بنحب البازار. كلمتنا كلمة. واللي بدك اياه بيصير. حتى إذا حابب تظهر بمظهر الإنساني فينا نبيعك كلمات مؤثرة عن أطفال شهداء. عن أمهات منكوبات. وعنا صور. بتبكّي الحجر. ألك مراق بالبكاء؟! لعينيك. وإذا بدك تضحك كمان لعيناك.
عنا كوميديا ما أنزل الله بها من سلطان. وموديلات بتخلي الرغيف السخن يضحك. أنت فايت على سوق ما فيك تطلع منه ألا ومحمَّل. لأ ومو بس طلبك موجود. طلبك وطلب ولدك وولد ولدك موجود كمان. حتى فيك تعمل منّا برامج أطفال. فيك تعمل منّا افلام كرتون. وفيك تعمل منّا طرائف من العالم. وفيك تعمل منّا أفلام رعب. وأفلام بوليسية. هلأ ببيعك مليون قصة رعب. ومليون فيلم أكشن. وثائقي وروائي. وحتى في منّنا على أدب رحلات.
سمعان شي بسوق الحرامية من قبل؟! إي السمع مو متل الشوف. هون الأسعار بالأرض. والبضاعة على قفا مين يشيل. وما في بلدية تصفّر لك. الوضع أمان. أمان أمان..
المدن
