معك تنقي وطن على كيفك هالمرة
نفر من جماعة بصمة المجر، عم يعاتب رفيقه النفر بالكامب الألماني لأنو شوي خوَّف النفرات الباصمين بهنغاريا. حتى اللي أخدوا إقامة منهن. بموضوع أنو هنغاريا طالبت بتسليمها عشرة آلاف نفر فلتان بأوروبا من الباصمين عندها. وما عندها مشكلة حتى لو كانوا كاسرين البصمة وآخدين إقامة.
قام جاوبه نفر أفغاني وقال: لا تتقلَّق يا نفر لأنو كل يوم في خبر. والعلم عند الإتحاد الأوروبي مو عنّا نحنا. رد النفر صاحب الإشاعة: نحنا مجرد نفرات عم نتوقع. عم نحلل. عم ننغمس باللعبة. بل عم نغرق فيها حتى. لأنو إذا ما غرقنا ما بتتذكرنا الصحافة وبؤر الثقافة. وبالتالي لا تتقلَّق يا أخي النفر. معك عشرين عام لحتى تستقر. ويمكن وقتها تستقر البلد. صحيح أنت من أي بلد؟ ضيعتك لوين انشاطت؟ أنت ببلد وبلدك ببلد. وما بيفهم عَ النفر غير اللي تحت براميل الوطن. ألله يرحمه السقف. صار لناس وناس.
لا تتقلق علينا يا نفر. نحن بخير تحت براميل الوطن. بكرة بتخلص البراميل وبيحترق سقف الوطن وبيوقع على راس المتفيين بظله. لا تتقلَّق يا نفر. وخليك بالموضوع الأهم. ألا وهو بصمة هنغاريا. لك صحيح قال طلعت هي نفسها المجر؟ يلعن روحهن هالأوروبيين.
كل مرة بيطلعوا لك بنغمة. يعني ليش كل هالقد خايفين النفرات من الرجعة على هنغاريا؟ قال بيعطوهن شقة 22 متر وراتب ميتين يورو إلا يورويين. مناح لبين ما الواحد يدبر شغل. لك شلون شغل بدون لغة؟ بدي عشر سنين لأتعلم هنغاري. ليش الألماني كنت رح تتعلمه بأسبوعين؟ لسه الأسبوع الماضي كتبت عالفيس عندك أنو يلعن أخت اللغة الألمانية ونشرت صورتك بالدرس مع الآنسة. ونشرت فيديو لمَّا الآنسة كانت عم تكتب ع اللوح والنفرات عم يلعبوا بموبايلاتهن الذكية. صح؟ لا تحذف البوست متذكره متل ماني شايفك هلأ. بقى شو بها هنغاريا أبو شريك؟ موعاجبتك بودابست؟ يعني نفر ومشارط؟
مظبوط معك حق تشارط. معك تنقي وطن على كيفك هالمرة. اسمه المرحوم وطننا ما كان تنقايتك. ليش لأ. حاسك فايت بسوق تهريب وعم تقيس وتلبِّق وطن على قياس أحلامك. وما حدا نزعلك الشوبينغ تبعك غير بصمة المجر؟
لا والله يا أبو شريك. الموضوع أكبر من هيك. لك يلعن أختها إذا ما رح تصير حلم القعدة بهنغاريا. لأنو السور صار جاهز. وبعد شهرين اللي بينمسك بهنغاريا ما رح يبصّموه. رح يرجّعوه ع صربيا. يوغسلافيا السابقة. بلغراد. ورح تصير البصمة العقدة هنيك. والبوليس اللي عم تشوفه عم يضحكلك اليوم ببلغراد رح يكمشك ويبصمك متل التوتو بصربيا بعد شهرين. ويمكن تتغير خريطة الطريق تبع النفرات كلها قبل حلول العام المنصرم. وبيجوز تفوت دول جديدة عَ الخط.
يعني الجماعة بلش يوجعهن راسهن من النفرات. بلشوا يتأففوا من النفر السلمي. ورح يعملوا منه قضية. ويقسّموه متل ماعم يقسموا بلده الأصلي. لانو متل ما بتعرف. النفر أرض وبشر. فلا تتقلَّق يا نفر.
من كتاب: النفر وسور المجر
المدن
