متنا يا أبو شريك وشفنا. ولي شو شفنا. أتاري بعد الموت بتفهم كتير شغلات. بتشوف. بتحس. بصراحة ما كان ممكن نعيش. ما كان في إرادة دولية. كل الإرادة الدولية كانت مشان نموت. ما كان بدهن نقول أنو عشنا وشفنا. يعني ما كان بدهن نشوف شي. قام متنا.
هنن قتلونا صح. بس بصراحة نحنا كنا سامحينلهن بهالشي. كنا متسَّلين مع الموت البطيء. كنا أحلى عبيد. قام هنن صدَّقوا. فكَّروا حالهن آلهة. وصاروا يقرّروا مين يعيش ويشوف. ومين يموت وما يشوف. أو بالأحرى ما يشوِّف حدا.
ونحنا بيني وبينك متنا. دبرنا حالنا ومتنا. متنا وشفنا. طبعاً ما شفنا عذاب القبر. لأنو بصراحة موتتنا ما كان مخصص إلها قبر. تقبري قلبي حياتي. مع أنو بعرف أنو هالشي مستحيل. معقولة تقدري تلاقي وقت لتقبري قلبي؟! قصدي تلاقي ظرف. ظرف زمان وظرف مكان لتقبري قلبي. مستحيل. بعيد الشر عن قلبَكْ حبيبي. بعيد الشر عن قلبي؟! والا بعيد الشر عنِّكْ حياتي؟! خايفة على حالك لما بدك تقبري قلبي؟! خايفة يقصفوكِ لما بتقبري قلبي؟ّ خايفة يشحطوكِ لمَّا عم تقبري قلبي؟! خايفة يعبُّوكِ؟!!
متنا وشفنا. متنا وشفنا لأنو ما كان بدهن نعيش ونشوف. ما كان بدهن نشوف. وبعدين صاروا ما يهتموا أنو إذا نحنا شفنا. صار يهمهن بس أنو ما عشنا. كبيرة بحقهن أنو نعيش ونشوف سوا. يا إما بنعيش. يا إما بنشوف. بس قصة أنو نعيش ونشوف سوا. فَدَه مستحيل قلبي يميل.
لا .. لا تطلب المستحيل يا ابن المنطقة. فالشقفة شقفتنا والحارة حارتنا. وما أنت إلا بغريب. اسمك غريب. شكلك غريب. وجودك من أساسه غريب. فلا تتأمل بالشوف. لا إمكانية لك بالنظر.
أما الرؤيا فإن أمرها بالنسبة لأمثالك مستحيل. مستحيل. قلبي يميل. لقد علمتني طيلة خمسين عام، أنك مربوط بخيوط أولاد الحرام. وأنك تمشي الحيط الحيط ويا ربك السترة. حتى وقع عليك الحيط من شدة ما لحمستَ عليه. وحتى صرت تطلب السترة دونما حيط. وصرت تركض كالمجنون في العراء.
وأنت العراء. أنت كامل العراء. أنت بذاتك العراء. أنت صحراء. أنت أرض لن يهطل عليها مطر. مع أنك صرتَ مقيماً في بلاد المطر. ربما تتزلج على الثلوج. ربما تتعلم لغة الأسوج. ربما تأكل ثمار البحر. وتفتح القواقع بيدك. ربما تجلس أمام الشومينيه. ربما ترمي بالحطب إلى النار. ربما ترحب بالزوار. وتطرق كأسهم بكأسك. ربما لن يكتشف أحدٌ يأسَكْ.
لكنك لن ترى. طالما أنت حي لن ترى. قدركَ أن تعيش مغمض العينين. عينتين يأخذك. وعينتين تانيتين بيجيبَك. وأنت تمشي كالخلد في الأنفاق. تختار الظلام. في عصر الظلام. والظُّلَّام. وتستكين لحزنك.
ما أجمل حزنك يا أيها الخلد. يا ملك الأنفاق التي لا تفضي إلى نور. قدرك أن تعيش كالأعمى. أن لا ترى الحياة إلا بموتك. متنا وشفنا يا أبو شريك.. متنا وشفنا.
المدن
