خيو صرعتنا بمصلحة البلد ومنفعة البلد، ممكن تعرفلي شو هي البلد؟، هل عم تحكي عن البشر أما الحجر أما الطقس أما المشورة بالشعلان والسهرة بعين الفيجة أما صبايا باب توما أما شو وجعك إنت بالزبط؟
لك بهديك الزمنات لما كانت الموسيقى موسيقى، مو سمسرة وشغلة اللي مالو شغلة يعني، كان في واحد معلم اسمو جيم موريسون، حشاش هو بس إنو حباب، عمل غنية اسمها بيبول آر سترينج، وبالنسبة للي راح مخو لشي تاني بحب قلك العين تطرقك، الزلمة عم يحكي عن غرابة الناس وإنو عقلون مدري شلون مركب، تماماً متل الأفندي يلي ما عاد انتبه شو عم يقرا وعقلو لسا بالسترينج
إيه بئا الناس غريبة يا سيدي، خاصة يلي بيروح وبيرجع بيقلك مصلحة البلد، لك أبي البلد ما إلها مصلحة، البلد هيه مكان جغرافي بيعيشو فيه الناس، بيعيشو متل البني آدمين يعني، وإلا كنا سميناها حظيرة، أو اسطبل، يلي بتشوفو إنت، والعيشة مو إنو الواحد ياكل ويشرب ويندفس بالفرشة، العيشة أكبر من هيك بكتير، وإذا عن جد شايف حياتك متمحورة بهالتلت شغلات بنصحك تروح تعيش باسطبل
لك شو هي مصلحة البلد مشان الله حدا يفهمني، بينط واحد بيقلك ما بدي البلد تخرب، ولك مين بدو يخرب البلد؟، يلي عم يدور على عيشة البني آدمين، أما يلي بدو الناس تضل عايشة باسطبل؟، معلومك الاسطبل ما فيه حرية وحقوق، الاسطبل بتاكل وبتشرب وبتندفس تنام فيه صحيح، بس والعصاية على رقبتك، أحياناً الصرماية، وإذا حنترت ورفضت تكون العصاية فوق منك بيسلخوك رصاصة بنص دين مخك
تسمحلي قلك طز عليك وعالبلد إذا بدي ضل عايش فيها متل يلي عايش بالاسطبل؟، إذا كانت تعتبر عيشة من أصلها، لك إذا ما بتعرفو شو معنى عيشة البني آدمين روحو شوفو العالم كيف عايشة، يستر على عرضكون شوفو جيرانكون بتونس ومصر وليبيا، روحو شمو شوية حرية وشوية كرامة، لا حدا يقلي ما فينا نصلح شي، بيجي واحد بيقلك والله يا معلم الصبي من وقت ما نزل من بطن إمو إيدو أنعم من إيد اختو، لك الصبي خالص العين تطرقكون، إذا ما اندعك كيف بدو يصير رجال ويخططو شواربو؟
خيو البشر لا تخاف عليهون، رزقتون مكتوبة بهالحياة من وقت ما نزلو من بطن أمهاتون، الحجر لا تخاف عليه بإيدين البشر بنبنيه، المشورة بالشعلان مو ضرورية، روح تمشى ببابا عمرو وتعلم شو معنى المرجلة، وصبايا باب توما لا ينشغل بالك عليهون، الحرية رح تعلمك كيف تدير بالك عليهون
معلشي لو شوي اندعك هالحجر، بركي بيعيشو هالبشر
