في سؤال كان كتير محيرني انو ليش هيثم مناع غير موقفو من النظام ؟
انا كنت مفكر حالي بعرفو, كنت بشوف كتير من نشاطاتو من ابل الثورة و كنت ازا حدا سألني عن اسماء معارضين للنظام السوري كان اكيد هيثم مناع واحد من الاسماء يلي لح ازكرها بس
بهل الوقت كتير من المندسيين معتبرينو من افراد النظام حتى
فبعد خبر التوقيع على البروتوكول الناس هاجمتوا و اعتبرت المناع عبارة عن اداة للمخابرات السورية تمكنت من خلالها من ضرب المعارضة
قررت اني اصفن شوي من شان اعرف شو صار
ليش المناع غير موقفو من معارض للنظام وات ما كان حدا عم يعترض عليه لموالي الو؟
ليش خان دم الشهداء وعائلاتون؟
وقف للحظة
شو من شان انو هو نفسو من عائلات الشهداء, اخوه مات شهيد, ابوه اعتقلو حافظ فترة طويلة وهو نفسو هرب بجلدو برات البلد وبالتالي من الصعب اني احسن اتقبلها انو هو خان دم الشهيد, الشغلة مالها منطقية, الزلمة عندو تار شخصي مع النظام
هون صفنت شي ساعة وبالاخير طلع معي نتيجة ما بعرف ازا هي صح ولا غلط
المناع ما غير موقفو
نحن يلي عملنا
نحن كنا نشوف اي واحد بنتقد النظام على اي شي بفترة ما قبل الثورة كمعارض
اي واحد بحكي او بكتب علنا بالمواضيع يلي ما منحكيها الا ادام المقربيين الموثوقين كان تلقائيا بصير معارض
اما هل الايام فازا الزلمة ما طلع و لعن روح حافظ شي الف مرة و هدد بشار بالوعيد فما بكون “معارض”
المناع بقي مخلص لمبادئو واهدافو يلي كان عم ينادي الها من زمان ابل الثورة حتى
كيف طلع معي هيك؟
الجواب
مناع بعرف منيح عن النظام وعايش فترة التمانينات وجرائمها يلي بتشيب الراس و السجون المرعبة يلي الناس كانت تفوت الها وما كانت تطلع, حتى لو جثث, وبالتالي العداد ضد النظام عندو معبي للاخير ومالح يزيد شو ما انسفك دم اضافي يعني بالمختصر المفيد هو بنى اهدافو اعتمادا على تفكير عميق و طويل وما كان عبارة عن رد فعل على الامور الحالية او الامور العاطفية يلي عم ترافقها
واحدة من الوسائل المستخدمة لتفهم الزلمة ليش اتخذ قرار معين هي انك تشوف شو هي المعلومات يلي بملكها و تحط حالك بموقفوا و تحالوا تجاري تفكيروا اعتمادا على اسلوب اتخاذوا القرارات بالماضي و بتشوف شو هي القرارت يلي لح تتخزها انت بهديك الحالة و بتشوفها ازا بتطابئ القرارات يلي اتخذها ولا لأ
ازا كانت مطابقة فغالبا وليس دائما عرفت ليش اتخذ هو القرار تبعو
اما ازا كان لأ فغالبا في المشكلة بمحاولتك مجارات تفكيرو او بسبب انو معلومات اضافية هو بعرفها و انت ما بعرف انو بعرفها او ممكن انك ما بتعرف بوجودها حتى
طبقت هل الاسلوب على هيثم مناع:
هو من جماعة حقوق الانسان مهتم بحقوق المرأة و الاقليات يعني متل اليسار الاوربي الغربي غالبا بكره سفك الدم وبفضل انو يكون الضحية على انو يكون الجلاد
فيلو تاريخ شيوعي قبل ما يضطر يغادر البلد ليعيش في فرنسا فترة طويلة فهو كمان من هل الناحية لح يكون متل اليسار الاوربي بكره السياسة الامريكية “الامبريالية العسكرية” وان كان غير معادي للغرب
فمناع كان ضد فكرة الغزو للعراق من شان الاطاحة بنظام صدام حسين (جزار الملايين ) يلي هو اشد بكتير من وحشية حافظ يلي بشار اقل وحشية منو (ابدا لا تفكر تقارن بين واحد امر بابادة 40 الف باقل من شهر بحماة مع مجازر متفرقة ضد المدنيين في لبنان و حلب و جسر الشغور يعني بكل المناطق يلي خالفتوه مع بشار يلي معدل ضحاياه حوالي 1000 كل شهر) وبتوقع قرار معارضتو للحرب نابع من رفض مبدأ الغزو للاطاحة بنظام مهما كان متوحش ودموي.
فبتوقع انو اهدافو هي متل اهداف اليسار الاوربي تتمثل بتحقيق دولة ديمقراطية محترمة لحقوق الانسان و الاقليات والمرأة مع نوع من الرعاية الاجتماعية
وسائله هي السلمية والسياسية بشكل كامل باعتبارو برفض سياسة الحوار بالبسطار او مجرد الدعس فيه على بشار حتى دون حوار بالاضافة الى الحفاظ على الدولة و محاولة استئصال النظام ببطأ خطوة خطوة حتى لا تســتأصل الدولة بالغلط مع النظام
فمنشان هيك منشوفو عم يحاور الكل دون استثناء “روسيا و النظام ومنشوفو على قنوات العالم والمنار”
اما ازا سألتني كيف هاد الشي لح يشتغل و ينفع مع بشار؟
ما بعرف وباعتباري بتصنف مع اليمين ما مع اليسار و شخصيا بؤمن انو بشار بفهم لغة القوة بس فمصطلح “حوار مع بشار” بالنسبة الي عبارة عن طلاسم ما بفهمها, بس بعرف شو بتعني
فدور على حدا غيري يجاوبك انو كيف ممكن هاد الشي يشتغل؟
بس بتوقع انو وسيلتو للتغير هي انو يخلي الروس يضغطوا على بشار متل ما الامريكان ضغطوا على مبارك, ما عندي جواب تاني!
هل الشغلة خارج مدى ادراك عقلي. ياريب لو حدا بعرف يحط الجواب
طيب ليش واحد يميني متلي بتلائيه ساكن بكل الاماكن يلي بترفع مستوى الادريناليين بالدم لمستويات قياسية عم دافع عن واحد من اليسار عاش حياتو دفاعا عن حقوق الانسان و يلي تقريبا شخصيتو مختلفة بشكل كامل عن شخصيتي وبشوفو جبان و بشوفني مجنون؟
لانو الزلمة معارض للنظام من ابل ما انولد انا نفسي
ربما سياستو ممكن تأدي لمخرج انا ما لي شايفو
بس مشكلتي معو هي انو بدو يفرض اجندتو السلمية بشكل ديكتاتوري علينا عن طريق رفض التدخل الدولي كسياسة عامة ما الاجندة السلمية المطلقة بحد ذاتها
ملاحظة:
الحكي هاد بس عن مناع ما عن باقي اعضاء هيئة التنسيق فحسن عبد العظيم ناصري و موقفوا ما بدو تعب كتير لتفهمو
ملاحظة تانية
الحظر الجوي ما بس هو يرفضو بالعكس كتير من الناس يلي بأيدوا التدخل العسكري برفضوا الحظر الجوي لوحده بسبب صعوبة التبرير”بشار ما استخدم طياراتو في قصف المدنيين, اما ازا استخدمها بقصف الناس يلي عم يحاربو بالسلاح فهاد شي تاني و ما حدا بحسن يمنعو من هل الشي هي حرب بالنهاية” ومشكوك بفاعليتو و قدرتو على اسقاط النظام”او شبه متأكد من فشلو في هذا الامر بسبب تجربة صدام” بالاضافة انو الجنود يلي بالدفاع الجوي يلي لح يذوقوا الموت الهابط من الاعالي ما تورطت ايديهون بالدم حتى تبرر موتون بسبب كونون مجرمين, موتون لح يبررو واحد متلي انو هنن جنود الاسد بس والجيش يلي عم يحاربوا فيه هو جيش معادي وهي حرب اوكانوا بالمكان الخطأ بالوقت الخطأ ولح اقرأ الفاتحة على ارواحون “الحرب مأساة” اما بالنسبة لمناع رجل حقوق الانسان فبتوقع انو هل الشي مالو مقبول ولا بأي شكل
بس بتوقع انو معظمنا بعرف انو مع سقوط اول القتلى فالناس يلي دعمت الحظر الجوي بناءا على العاطفة لح تنقلب ضدو بناءا على العاطفة ايضا
http://the-syrian.com/archives/60148
