الرئيسية / صفحات سورية / الى جماعة”منحبّك”..ان نحبه..لا يمنع ان نعرف الحقيقة

الى جماعة”منحبّك”..ان نحبه..لا يمنع ان نعرف الحقيقة

 


عبير العلي

رسالتي اليوم اوجهها الى محبي الرئيس بشار الاسد … اول شي بحب قوله..من حق كل انسان يحب الشخص اللي بده اياه..ما حدا بيقدر ينكر ولا حدا بيقدر يمنعكون…بالعكس انا بحترم مشاعركون وما ممكن اطلب منكون ولا من اي شخص انه يغير مشاعره..لانه هاد شي مو من حقي ولا من حق اي حدا.. بس انا..وكل السوريين..(وخاصة السوريين اللي بيحبوا بلدون وبيغاروا عليه وبيحبو انه يكون احسن بلد بالعالم)……عنا طلب..او الاصح هو رجاء….رجاءنا الكون انه تسألوا عن الحقيقة “الفعلية”…ممكن (وانتو ” عم تقروا هلق” تقولوا”اي حقيقة؟..منعرف الحقيقة..”في مؤامرة على بلدنا سوريا..والمظاهرات اصلها ارهابي وبدها تخرب البلد”…ماشي الحال..لنفرض انه هي الحقيقة…طيب..وين الدليل؟..اسالوا حالكون هالسؤال!….قولوله “يا رئيسنا المفدى..اللي منحبك كتير…بدنا دليل…قولوله ” نحنا منحبك..بس بدنا نعرف الحقيقة…بدكون تقولولي ان التلفزيون السوري وقناة الدنيا ووكالة سانا”قالوا انه في مؤامرة وفي ارهابيين وسلفيين ومدري شو”..طيب..انتو شفتوا بعينكون؟؟؟؟…قناة الدنيا والتلفزيون السوري فرجوكون شي فيلم او فيديو واضح عن هالارهابيين والعصابات المسلحة؟؟؟ انا بصراحة اتفرجت كتير على قناة الدنيا والتلفزيون السوري..بس قلكون الحقيقة..؟!..ما اقتنعت…ما عندون دليل واضح وغير قابل للتكذيب..وقت شوف قناة الدنيا والتلفزيون السوري..بحس انه دماغي عم يسبني عم يلعني…عم يعاتبني…دماغي بيصير يقلي”يخرب بيتك شو “دبة” كيف فيكي تقعدي تتفرجي على هيك اخبار وتصدقيها…وبيكمل دماغي وبيقول..”شو ما عندك دماغ تفكري فيه؟..استعملي دماغك…اسالي حالك…انه ليش هالتلفزيون السوري اللي صور العصابات والسلفيين…ليش ما قبض عليون؟..ليش تركون يقتلوا العالم؟؟  طيب بلاه هالسؤال هاد..اسالي حالك ليش  التلفزيون ما صور فيدو كامل و واضح عن هالعصابات وفرجانا اياهون بالجرم المشهود…مشان ما يضل عنا مجال للشك… قبل ما كمل رسالتي…حابة قلكون انه انا ماني من المفكرين اللي بيحبوا يحكوا كتير ويفلسفوا الامور…انا انسانة عادية بسيطة جدا…وياما بصغري وبشبابي طلعت بمسيرات تأييد للرئيس الحالي والسابق..(كنت انا ورفقاتي ننبسط بس يقولولنا انه في مسيرة..بتعرفوا ليش؟؟…لانو كان بالنسبة الي يوم المسيرة هو يوم “حرية”…اي اي لا تستغربوا…بالمسيرة بتصرخ باعلى صوتك”بينبح صوتك” بتحس انك عم تعمل شي…بتفرغ طاقاتك وشحناتك…بتحكي بصوت عالي..بتغني وبتضحك…هي حرية…بس رح قلكون بصراحة اكتر…(وبعرف انه انتو بتعملوا نفس الشي بس تطلعوا مسيرات”) مثلا كنا نقول” 7 نيسان يا رفاق..وااااق واااق وااق واااق…ونضحك وننبسط”..كنا ولاد صغار او شباب باول العمر وبدنا نلعب وننبسط…ما كنا نفهم شو يعني مسيرة وهتاف وغيره)… ــــــــــــــــــــــــــــــ طيب…منرجع لموضوعنا…كنا عم نحكي عن الدليل والاثبات  والبحث عن الحقيقة…طيب بيني وبينكون…ما بتتفرجوا على قناة الجزيرة؟؟؟.. والعربية والبي بي سي؟؟؟…بعرف انكون بتتفرجوا…لاني بعرف انكون ناس اذكياء وبتحبوا تدورا وتعرفوا شو عم يصير..حتى لو كان اللي عم يصير ما بيرضيكون..بس عالقليلة بيعطيكون فكرة عن شو عم يصير..او اذا بدكون منقول شو اللي عم يتدبّر…. طيب انا لو بمحلكون…بتفرج على اي قناة بتحكي وبتجيب معلومات مشان اعرف شو عم يصير وبعدين بيني وبين حالي وعقلي بشكل رأي وموقف…انا ما بقبل..وبعرف انه انتو كمان ما بتقبلو..انه يجي حدا “مين ما كان” يكون يقلكون انه هي الحقيقة هون جاهزة..انتوا بس اقعدوا وارتاحوا واهتفوا باسمي..ما؟؟…بعرف انكون ما رح تقبلوا…لاني بعرف وواثقة انكون ناس اذكياء وطيبين وبتحبوا الخير وما بتحبوا تظلموا حدا..ـــــــــــ الظلم صعب كتير كلكون بتعرفوا هالشي… طيب تعوا لاحكيلكون هالقصة…من شي اسبوعين صارت مظاهرة بسوريا وواحد من الناس اللي كانوا بالمظاهرة”صديقي” بعتولي فيديو عن المظاهرة وشفت انه لا كان في معون سلاح ولا في ارهابيين ولا شي…المهم صديقي اعتقلوه الامن…قعد كم يوم بالسجن وطلع…اي شو بدي احكيلكون؟؟ أكل قتل وضرب وتلبيط ليوم التلبيط والضرب…مسكين جسمه مكسر….. صديقي هاد شب باول عمره..بس بيحب بلده وبده انه بلده يكون احسن بلد….وانا واثقة انوا انتوا”اللي بتحبوا بشار”  كمان بتحبوا البلد وبدكون اياها تكون احسن بلد…بس الفرق بالطريقة اللي انتوا عم تحبوا البلد فيها ..والطريقة اللي صديقي عم يحب البلد فيها…. صديقي المسكين اللي لهلق جسمه مكسر وعم يوجعه كتير..كان يشوف قناة الجزيرة والعربية والتلفزيون السوري وقناة الدنيا…وكان محتار مين يصدق…قناة الدنيا اللي عم تقول انو المتظاهرين ارهابيين وسلفيين..ولا قناة الجزيرة اللي عم تحط فيديوهات وصور للمتظاهرين وصور للمظاهرات بكل مدينة…صديقي “طبعا” عنده اصدقاء كتير بكل مدينة من سوريا…وكان اوقات يشوف ناس بيعرفون بالفيدوهات تبع المظاهرات وفي منون اصدقاؤه…يعني صديقي بيعرف ومتأكد انه هالناس اللي طلعوا بالمظاهرة مانون ارهابيين ولا سلفيين..لانو بيعرفون منيح…. المهم…هالصديق اللي عم احكيلكون عنه…احتار لفترة مين يصدق…قصة الارهابيين والسلفيين..ولا قصة انه الحكم والنظام عنا بسوريا “ظالم”..وكم يكذب عالعالم..وعم يختلق هالقصص  مشان يخلي العالم تخاف وما تنزل عالشارع وتشوف شو عم يصير…. بس بالاخر”لا يصح الا الصحيح”  صديقي شب متله متل كل هالشباب..”متلكون يعني” شب محترم واعي..واهم شي ما بيكذب على حاله وما بيسمح لحدا يكذب عليه…مشان هيك نزل بنفسه عالشارع وعرض حياته للخطر…مشان يعرف الحقيقة…. هالشب الصادق اللي ما بيحب الكذب ولا النفاق ولا الخيانة…راح على رجليه على جامع بالميدان بالشام….(على فكرة الشب مانه سنّي ) يعني لا تقولولي “سلفي” ولا تقولولي شغلة عادية انه يروح عالجامع)…لا..مو عادية…لانو عادة هو ما بيروح عالجامع…المهم راح عالجامع وصلى مع المصلين…(كل هاد ..بس مشان يشوف الحقيقة بعينه”..وبعد الصلاة..مشان يتاكد من الحقيقة…طلع بمظاهرة مع هالناس…..وهتفو”حرية” ووحدة وطنية”…ما في شوي ولا الامن بيجي وبيضرب قنابل الدموع عليون…وبينزل ضرب بالعالم بالعصي وبالرصاص….وطبعا ناس كتير من هالمظاهرة صارت بالمعتقل… بلا طول سيرة…بعتقد انكون بتعرفو انه هالايام كل القصص متل قصة صديقي”اللي بيحب بلده”…في مظاهرات كتير وفي قنابل مسيلة للدموع كتير…وفي قتل كتييير كتيير… ــــــــــــــــــــــــــــــــــــــــ رح تقولولي انه في كتير “شهداء” من الجيش…رح قلكون…صحيح…في شهداء كتير من الجيش…هي حقيقة…بس السؤال..مين قتلون؟؟؟؟ بدكون تقولوا عصابات ارهابية ومسلحين..؟  ماشي  انا بدي قول..وين الدليل؟؟… بصراحة قناة الدنيا ما قدمت دليل مقنع…ولا التلفزيون السوري ما عنده دليل مقنع….لانو فكوا معي..شوي….”وقت تطلع مسير تأييد للرئيس ما بتبين العصابات المسلحة..مع انو ملايين الناس طلعت ومن السهل جدا انو المسلحين “يندسوا” بيناتون”…بينما وقت تطلع مظاهرة ضد الحكومة…منلاقي هالعصابات خلقت من تحت الارض وقوصت عالعالم وعالامن عالجيش”…يعني ببساطة كل واحد عنده عقل…بيقعد بيقول لحاله”العمى..كانه هالعصابات المسلحة بتحب الرئيس؟؟!!..او متفقة مع الحكومة؟؟؟!!!”…لانو شي غريب كيف ما بيبينوا الا وقت يكون في مظاهرة ضد الرئيس….   طيب بلا طول سيرة عليكون …. هو طلب واحد او رجاء.. انتو ناس اشراف وبتحبوا البلد وبدكون تحافظوا عليه…وعندكون الذكاء والقدرة الكافية لانه تعملوا هالشي… بس اول شي… لازم تعرفوا الحقيقة…بلا الحقيقة صعب تقدروا تعملوا شي… انا لو محلكون..بنزل عالشارع بكل احترام وكل نظام وبحمل لافتة مكتوب عليها”منحبك..بس “بدنا نعرف الحقيقة”” ……….. وبالعقل كلشي بيزبط….اذا انتوا”اللي بتحبو الرئيس” مقتنعين انه هو بيحبكون وبده مصلحتكون..معناها ما في خوف…ما رح يؤذيكون…ورح يخاف عليكون ويحميكون…ويهتم بمطالبكون..ويحترم عقولكم”وهاد اهم شي”… اما اذا مانكون مقتنعين انه هالرئيس”اللي بتحبوه” بيحبكون وبتهمو ه  مصلحتكون وحمايتكون…فعلى شو عم تحبوه؟؟؟…”خوف؟؟ نفاق؟؟؟خايفين يعتقلكون اذا ما حبيتوه؟؟؟  فكروا واذا لاقيتوا انه ممكن يعتقلكون اذا ما كنتوا بتحبوه…معناها بكل بساطة ما بيستاهل انكون تحبوه ولازم تدورولكون على واحد بيستاهل…   يتبع.. ….

 

اضف رد

لن يتم نشر البريد الإلكتروني . الحقول المطلوبة مشار لها بـ *

*

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

x

‎قد يُعجبك أيضاً

حسم الصراع السوري محلياً وتأجيجه عالمياً ؟/ عادل يازجي

    خطوط التماس الإقليمية في المشهد السوري ساخنة ومتوترة سياسياً وعسكرياً، وهي تحتمل أكثر ...