كتير منسمع عالم عم تقول انو الوضع عم يتغير و الامور احسن و انا هلأ عم اشتغل ببنك او شركة اتصالات و اقبض راتب جيد بالمقارنة…راتب يكفني اشتري سيارة بالتقسيط و اطلع كل اسبوع اتعشى و ارغل مع الشباب و الصبايا…و حتى بيكفي مصاريف انو يصاحب بنت….بس وقت القصة بتجي للبيت و المستقبل و الكبرة و هالقصص بيصفن شوي و بيرجع لقصة الارغيلة و البنوتة….هدول طبعا متعلمين الطبقة الوسطة او بقايا الطبقة الوسطى بالمدن الكبيرة…و تحديدا بالشام لانو ما بعرف شو الوضع بحلب او بباقي المحافظات…
المشكلة عم تصير عند فئة من العالم انو عم يقارنو حالهون مع عالم وضعهون اسوأ او عم يقارنو حالهون بالوضع العام وقت كانو عم يكبرو..انو هلأ السيارة مالها حلم متل ايام زمان..فطبيعي نقول ايه الحمدلله….و يمكن حتى نلوم الاشخاص المعترين انو ليش ما درسو لغة او جامعة او اي شي…و طبعا الاستياء من الهجرة من باقي المحافظات للعاصمة….و اهل العاصمة انو مفكرين الناس عم يجو عالشام لانو الشام هي لاس فيغاس و الحياة حلوة فيها و في اراغيل…..
ما منفكر بأبعد من هيك….شو مستقبل… شو باقي الملايين…دخلكون…منحكي بالموضوع لما نخلص من الارغيلة….اساسا ما بدنا نحكي بالموضوع لانو مبسوطين بالامن و الاستقرار…..ممكن انسان فضولي مندس يتسائل اذا مافيك تحكي بكتير مواضيع بتهمك و بتخصك كسوري و انت بمكان عام لانو بتخاف حدا يسمعك و يشحطوك…فأنو امن عم تحكي عنو؟……هيك اهلنا علمونا و نحن عجبتنا الفكرة و كملنا….انو ظريفة الارغيلة..
اذا مننظر لشوية ارقام منشورة من دراسات حكومية او دولية عن الاقتصاد السوري و الوضع بالبلد منشوف هالشوية معلومات ممكن تشرح للبشر ليش العالم بيجو عالشام و شو الوضع حواليهون:
– 34% من الشعب السوري يعيش تحت خط الفقر…من بينهون مليونين و ميتين الف سوري بيعيشو بفقر شديد –اي بمدخول بحدود 90 ليرة باليوم….و من هدول في 670 الف سوري بالقامشلي و هالمناطق اكلهون الرئيسي هو خبز و شاي محلى و لما ارتفع حق السكر حتى شاي محلى ما عاد حصلو.
– مستوى المعيشة بين الالفين و خمسة و الالفين و عشرة هبط بنسبة 43% و حسب مؤشر ال PPP و هالشي سببو عدم تناسب النمو الاقتصادي مع النمو السكاني
– نسبة الزيادة الحقيقة للرواتب بالعام 2007 هبط بنسبة 6.7% مما كان عليه بالعام الفين و خمسة
– اربعين بالمية من السوريين بيعيشو ببناء مخالفات و خمسين بالمية من الابنية بدمشق هي مخالفة..و الابنية المخالفة مافيه ملك و تملك لانو الملك لله و للحكومة
– اسعار العقارات بدمشق من ضمن قائمة اغلى عشر مدن بالعالم مو لانو دمشق هي عاصمة مالية او تجارية او اي شي من هالقبيل… بل لعدة اسباب منها انو يلي معهون مصاري يشترو بيوت بالشام مثلا و ما ببيعوها الا بمرابح كبيرة اكتر من ما بتسوى…بدون قيمة حقيقة للعقار بتبرر هالسعر…و اذا ما اجا السعر ما بيبيعو لانو مالهون بحاجة ليبيعو… و لانو يلي عم يستثمر بهل القطاع فايت للربح الصاروخي..صفقات سبيكيوليتف..بيشترو محاضر بأسعار غالية لانو بيتوقعو اسعار عقارات عالية جدا و كل هالشي بيرفع الاسعار….او بيشترو اراضي غير منظمة بسعر رخيص و بقدرة قادر بيطلع قرار بينظم هالاراضي تاني يوم بعد ما اشترو و بصير سعر المتر مليون ليرة و ببيعوه لتاجر عمار و هكذا مجرة….و بنفس الوقت مافي تدخل حكومي للحد من هالشي على الاقل من خلال مشاريع اسكانية تسد حاجات الشباب و تخلص خلال اقل من اربعين سنة…
– كيلو اللحمة كتير غالي يا عالم..مو بس بسبب التصدير…بس بين الخمس و السبع ملايين راس غنم ماتو لانو صحابهون ما معهون مصاري يعلفوهون
– البطالة نسبتها الغير رسمية فوق العشرين بالمية…يعني اربع ملايين سوري عاطلين و معطلين عن العمل…عدا عن نسبة الموظفين يلي اندر امبلويد…ست سبع موظفين لازم يختمو ورقة وحدة مثلا…انو سعدان ممكن يعمل هالشغلة ما بدها سبعة..
– من اصل 180 دولة…سورية ترتيبها 126 بمستوى الفساد بالدولة..علما انو الرئيس قال و كرر انو الفساد تمت مكافحته
– من اصل 183 دولة..سوريا ترتيبها 144 بمستوى سهولة تأسيس بزنس…و لو بتشوفو مين سابقين بتبكو
يعني من وين ما اطلعنا عليها مو زابطة…و القطاع الزراعي بسوريا اتضرر كتير من القحط و من جحشنة الادارة الحكومية المتمثلة بوزير الزراعة السابق….يلي هلأ صار رئيس الوزراء الحالي…ليش و شلون و كيف….هالامور ما بيعرفها غير الله….بأعتبارو هو يلي حامي البلد….بيجوز يكون في حكمة الهية بترقية شخص فشل بأدارة وزارة وحدة ليدير جميع الوزارات…
هلأ اذا قريتو الكلام اعلاه و ما فهمتو القصة…انو يعني مالكون بالارقام و النسب المئوية و هالعلاك الفاضي…فأنا عملت ملخص كتير صغير للوضع الاقتصادي فيكون تلاقوه هون…
يمكن لازم نحط الارغيلة من ايدنا و نشوف سوريا من منظور كل السوريين…مو بس من منظورنا الشخصي….و اذا انا حاسس بالامان و انا عم ارغل…مامعناها غيري ما عم يبكي كل يوم و كل ليلة من القهر و الجوع بكل انحاء سوريا…اذا انا حاسس انو التغيير منيح بس على مهل و خلينا ننطر كم سنة و نشوف كرمال ما يصير فوضى و تنكسر الارغيلة…ابدا مو معناها انو مافي ملايين من السوريين بحاجة لتغيير جدي من هلأ و الفوضى بالنسبة الهون مالها اخرى من وضعهون الحالي……و من هون لخمس او عشر سنين..انت وولادك وضعكون مارح يكون احسن….الا اذا رافقتلك شي مسؤول او ابنو يلي هو رجل اعمال…معناها ماعليك خوف..
بس ابدا مو منشان يأرغلو…بس منشان ياكلو…يا جحش
http://hashashji.wordpress.com
