عم جرب من لما سمعت بالخبر إني اكتبلك شي. ما عم يطلع معي، مدري ليش إلي فترة ما عم أعرف أكتب. قولتك الموت بيخلي الواحد ينسى كيف يكتب؟
عم حاول أتذكر شي يوم طلعنا في أنا وأنت سوا وما تخانقنا. بتتذكر لما التقينا أول مرة، كنا بورشة عمل تصوير ضوئي وحضرنا معرض سوا وعملنا معرض سوا، بعدين اجيت انت وتطوعت بالجمعية السورية للبيئة وصرنا صحبة، وكنا نتخانق كل يوم. تضرب بشكلك ما بذكر مرة التقينا وماتخانقنا. بالجمعية وبورشات العمل وبالـ Y-Peer وبطلعاتنا سوا، وكانوا ندووش وليلى كل مرة يقلولي لك ما بتمل من الخناق مع عماد.
لك خلاص والله اذا بدك تعا واخرى عليي بس رجاع، والله ما عاد خانقك 🙁
لك عماد شو كنت عم تعمل عالبلكون بهديك الدقيقة، لك مؤيد ما قلك روح عالضيعة لعند أهلك، وأنت تنحت بدك تضل بالشام، بشرفك معقول كرمال كم صورة ما عاد اتناقر أنا وأنت.
بتعرف إني لهلئ ما بعرف شو دينك ولا شو طائفتك، مع إني كنت شوفك تقريباً كل يوم.
يلعنك يا ولد أنت وبسام القاضي، يحرق ديبك لك ليش كنا نتخانق كرمالو لهالزلمة. ليك إذا بدك ارجاع وبنتخانق مرة تانية وبنخلي رفقاتنا يضحكو علينا، ونضل عم نتناقر وبعدين بنروح بناكل تسقية ولا كأنو صار شي. وإذا بدك بناكل شاورما، أصلاً أنا مشتاق أكول شاورما من عند الباشا وبيروح معنا نور كمان بيحبها وإذا بدك بناخد عبد العزيز معنا.
لكك خلاص ولو لا تكبرها، عم قلك بلا معنى.. هههههههه بتتذكرالبلا معنى ما أنا وأنت وليلى وعليا وندى. تضرب بشكلك شو بلا معنى. اشتقتلك يا كلب.
لك عماد ولو والله ظريف التصوير، تعا صورني شي صورة ظريفة ولا قلك صار عنديخبرة أكتر منك أنا رح صورك وبتشتغل معي موديل 🙁
لك عماد اشتقتلك يا ابن أمي تعا رجاااااااااااااااااااااااااااااع
