انسبطت لما شفت الاشخاص الي بتابعهن عم يكتبو تدوينات حلوة متل زمان قبل ماتتحول كل المدونات لجرايد تحليل سياسي .. ما فكرت تكون المدونة شي نهار مكان لارائي وافكاري السياسية ماقدرت اطلع من جلدي ببعض اللحظات بس كنت حاسة بتوازن ..هلا فقدتو
كتير صعب فكر بشي تاني .. فكر انو كل الاشيا ممكن تكون عادية بعد اليوم
وصعب بنفس الوقت حول مدونتي وفسحة حريتي لسجن تاني وتالت ورابع وتحاصرني متل ما الاخبار عم تعمل فيني وين مكان ..
انا حرة من جوا .. بيني وبين حالي عم تتردد هالكلمة لحالها وكل مرة بسمعها جواتي كتير برتاح لانو كل شي برا مش مهم ازا انا كنت مشوهة ذاتي ..
بغرفتي وبعز الشوب في صوت مروحة .. عالم كامل عم يحس بالشوب .. بالدبق.. بالحياة ببساطتها من جانب
ومن جانب تاني عم فكر حط كاسة العصير ببرواز هيك متل ماهي, فيها شوية عصير رمان وشفايفي المطبوعين عليها بنرجسية مش واضحة ..الشمس زهقانة والموت زهق
بتمنى حدا يقلي : فوتي على خيالك تسكّر عليكي *
من وقت مابديت حياتي الجديدة بعيد عن التفاصيل المبالغ فيها صار خيالي يكبر
بحب شي يوم رافق خيالي ويصير يمشي جنبي مش وراي او يمشي قدامي ازا حابب ..
لطيف خيالي عفكرة .. والكاسة تبعي لطيفة .. والحياة لطيفة وكل شي تمام ..
http://samarasallam.wordpress.com
