للمثقف العديم اللي وقع بسلة تين ملاحظة أنو النفرات لازم يعرفوا أنو أوروبا مسيحية (غيتي)
للجميع ملاحظات على الشعب، نورد لكم قبسات منها:
للمثقف الموضوعي المحلَّف ملاحظة أن مظاهرات الشعب خرجت من الجوامع. ولن نسرد عليكم ما لم يلاحظه لأنه كثير كثير.
للمنحبكجي المتعجرف ملاحظة أن الشعب بجم، وأنو بلا مليون وبالناقص من هيك شكيلات، ثم تطورت معه الحالة وقال أنو بلا مليونين، وتطورت معه الحالة أكتر وقال أنو بلا تلات ملايين، وبعد ذلك تفاقمت معه الأمور وصارت أنو بلا الكل، أنا ومن بعدي الطوفان.. يقولها بعد أن يستغفر الأسد.
للمثقف المستشرق المقيم القديم تحت سقف أوروبا ملاحظة أنو الشعب بجم وما بتلبقله أوروبا، وأنو يروح يدافع عن بلده هالجبان أحسن ماله لاحقه لأوروبا.
وللمثقف العديم اللي وقع بسلة تين ملاحظة أنو النفرات لازم يعرفوا أنو أوروبا مسيحية، وأنو ثقافتها مسيحية، وبيستحي لما حدا بيقول له السلام عليكم، وبيرتفع الأدرينالين عنده لما بيشوف نفر عم يضحك بالشارع بأوروبا.
بينما للمثقف المتطور ملاحظة أنو ليش النفراية ما سلمت مصافحة على وزير أوروبي محترم، وأنو إذا ما عجبها تروح على السعودية، طبعاً هو مو رئيس وزراء دولة أوروبية، هو كمان نفر، بس حوينته فيه اسم النفر.
وللناشط في أوروبا ملاحظة أنو النفرات ما بيجوا عالوقفات التضامنية، يا أخي شعب بجم عنده خلل في الغدد الثورية.
وللمثقفة المدهرنة المنحبكجية المقيمة في البلاد الأوروبية على أساس ثورجية ملاحظة عالنفرات أنو ليش بيقولوا للمعونة راتب، شعب بجم بهدلونا قدام الأجانب، ولازم الأوروبيين يخفضولهم الراتب للنص، عفواً المعونة.
وللفنان المعارض المزمن ملاحظة أنو الشعب بجم اختار توقيت خاطئ لإثارة الفوضى في زمن المقاومة والممانعة، ووصل فيه انفصام الشخصية لتحية أصحاب اللحى الشيوعية والشيعية قشة لفة. بيعة مسا.
وللمذيعة الفهلوية ملاحظة أنو الشعب بجم وما بيستحق يظهر بالصور إلا إذا كان ميِّت، لأ ومن باب الفخر مستعدة تاخد مع القتلى صور تذكارية.
وللمنحبكجي الفهيم والعادي ملاحظة أنو الشعب بجم ومتآمر، بصندويشة طلع بمظاهرات وشرطك ملفوفة بخمسمية.
وللباحثة الإجتماعية المتعاونة مع الجمعيات الخيرية لشؤون اللاجئين في المخيمات ملاحظة أنو شعب بجم وفجعان.
وللمعارض الفندقي ملاحظة أنو الشعب بجم وما عنده ثقافة سياسية بالشؤون التركية.
وللرئيس ملاحظة أنو الشعب جراثيم.
وللفنانة الممثلة القديرة ملاحظة أنو الشعب كذاب وما عم يموت، وأنو اللي عم تشوفوه تمثيل بتمثيل، وأنو حلب مو حلب، وأنو اقصفوهن ما ماتوا هدول، عم يمثلوا دور الميت عالشاشات تمثيل.
وللشيخ الجليل ملاحظة أنو النفرات ما عم ينتبهوا عالمؤامرة اللي بتتمثل بأنو الحكومات الأوروبية عم تدس لهن بالأكل لحم خنزير.
وللشيخ الأجل ملاحظة أنو النفراية انزاح حجابها من على راسها هي وعم تغرق بالبحر.
وللمثقف المهاجر القديم ملاحظة أنو نحنا شعب ما بتلبقلنا الديمقراطية ومستحيل تتطبق عندنا.. مستحيل.
هاد الأخير مصرّ أنو يقول نحنا ويسبّ على نحنا بكل فخر واعتزاز، وبمختلف اللغات الأجنبية.
المدن
