تحت سقف الوطن ؟

كلما شفتني وصار بدك نصل لمحل مشترك ، من باب انو تعودنا ما فينا نكون مختلفين ونقبل بعض .. .. بتجي بتقلي لازم كل شي يتم تحت “ سقف الوطن “

ناس بتاكل قتل من تحت الحزام ، وانت لسى مصر “ تحت سقف الوطن “

صفقات عم تتمرق من تحت الطاولة وانت بتعيد عليّ “ تحت سقف الوطن “

والمشكلة بديت وقت اتفقنا انو كلنا تحت سقف الوطن واختلفنا شو هو الوطن ؟

واحد من رفقاتي مصّر أنو صدر حبيبتو هو الوطن وأكيد ما فينا كلنا نكون  بهالحالة تحت سقف الوطن  ؟، والتاني عروبي للنخاع مصر أنو الوطن هو من المحيط للخيج بما فيها جزر القمر إذا بدك ، القومجي بدو سوريا الكبرى وعم يحلم بوطن بيضم قبرص ! في عندي واحد متأكد أنو الوطن هو الكون كلو .. وفي ناس الوطن بالنسبة الها هو شخص واحد وكرمالو عندا استعداد تدمر البلد  كلها فوق راسي وراسك

لهيك شيلك من الشعارات صدقني ؟ شيلك من أنو كل الاطراف معولة على وعي الشعب السوري وتعا نحكي كلمتين عمليات

ما بيوحدنا تحت سقف واحد يا عزيزي إلا قانون بيضمن حقي وحقك ،قانون ما في حدا فوقو !

الدول ما بيحكمها الشعارات “ المفروض “ ولا النوايا ، ما في شعب منيح وشعب خمس نجوم

اي انت اللي شايف السوريين احسن ناس بالدني غلطان ! وانت اللي شايفن بجم وما بيلبقلن أكيد أكيد غلطان

الشعب منوع ، وتتحافظ الدولة على النظام والمساواة وحقوق الناس في اختراع حضاري هو القانون

أنا بحلم بقانون بيساوي بينك وبيني بالحقوق والواجبات ، قانون ما بينتهك حقوق الانسان اللي سوريا موقعة عليها من سنين

بحلم بمحاكمات عادلة ، لكل حرامي ( مين ما كان يكون ) ولكل مين إيدو ملوثة بالدم

بحلم بقضاء مستقل ونزيه …ما بتحكمو لا الرشاوي ولا المخابرات

بحلم أنا وانت والناس الكبار ، يحكمنا القانون

انت ما بتحلم هيك ؟ معقولة ؟

http://www.marcellita.com/2011/07/blog-post_26.html